Kryetarja e Lëvizjes Socialiste për Integrim, Monika Kryemadhi deklaroi sot se LSI do të çlirojë ekonominë nga monopolet dhe do ta bëjë Shqipërinë shtëpinë e investimeve.
“Me punësimin është abuzuar dhe gënjyer shpesh. Të gjithë i kujtoni premtimet e pambajtura për 300 mijë vende pune! Për ne punësimi është jetik për t’i kthyer besimin rinisë tek Shqipëria, si shtëpia jonë e përbashkët”, tha ajo duke prezantuar pika të programit të LSI-së.
“Ne do të çlirojmë ekonominë nga monopolet dhe do ta bëjmë Shqipërinë shtëpinë e Investimeve. Do të krijojmë Zonat e Lira Ekonomike dhe do të mbështesim drejtpërdrejtë krijimin e çdo vendi të ri pune për rininë dhe profesionistët”, u shpreh Kryemadhi.
“Me programin Garancia Rinore do të mbështesim sipërmarrjen e lirë të profesionisteve të rinj në fushën e Teknologjisë dhe Inovacionit. Do të mbështesim drejtpërdrejtë prodhimin vendas bujqësor e blegtoral dhe industrinë ushqimore, që shqiptarët të ushqehen me produktet e tyre cilësore”, tha Kryemadhi.
“Reforma në arsim do të përgatisë profesionistë të aftë për punësim dhe me paga dinjitoze. Gjithë politikat tona do t’i shërbejnë punësimit. Ne e mbajmë fjalën! Shqipëria do të bëhet Shtëpia Juaj”, theksoi kryetarja e LSI.
