“Nëse nga ana e tregtarëve nuk do të ketë reagim të menjëhershëm, atëherë do të jetë policia e shtetit dhe inspektoriatet që do të imponojnë respektimin e masave. Madje do të rrisim edhe gjobat për lokalet, baret, restorantet dhe qendrat tregtare”, paralajmësoi sot Kryeministri Edi Rama.
Ai tha se tregtarët duhet të nisin të zbatojnë me rigorozitet masat anti-Covid pasi në të kundërt do të jetë policia dhe inspektoriatet që do të ndërhyjnë edhe forcërisht.
“Është e patolerueshme që në lokalet dhe baret më të mira të Tiranës të kërcejë COVID me muzikë. Kjo është e patolerueshme. Jemi në një front ku askush nuk duhet të krijojë të çara. Secili ka përgjegjësinë e madhe lidhur me këtë situatë”, tha Rama.
Sipas tij, një situatë e tillë e patolerueshme duhet të marrë fund dhe secili duhet të mbajë përgjegjësinë e tij, ashtu sikundër e parashikon ligji.
