Nga Elton Laska
Nisja e hetimeve nga SPAK për çështjen e përgjimeve të Antimafias italianë, në kuadër të dosjes “Ndrangheta” është një lajm që duhet përshëndetur dhe duhet shpresuar për një hetim serioz, të plotë dhe gjithëanshëm, gjë që na e garanton prania e autoriteteve italianë në hetime.
Edi Rama duhet të jetë zyrtari i parë që duhet të paraqitet në SPAK për t’u pyetur në cilësinë e personit që ka dijeni për ngjarjen.
Kriminalizimi i administratës publike dhe glorifikimi i të inkriminuarave është një ndër krimet më të rënda që ka konsumuar Qeveria Shqiptare dhe fajtori i vetëm për këtë është vetëm një, Edi Rama.
Kur denoncimet e opozitës janë faktuar si në rastin Roshi, Xhafaj, Tahiri, Rraja, Dako apo Ymer Lala, kreu i qeverisë shqiptare i ka marrë nën mbrojtje, ndërkohë për të shpëtuar lëkurën e tij i ka lëshuar pas presionin ndërkombëtar.
Përgjimet e “Ndranghetas” faktuan, se paratë e botës së krimit me bekimin e Edi Ramës po pastrohen në kullat e kryeqytetit.
Gjatë punës sime dhe kontakteve personale, kryesisht me biznese të sektorit fason më janë ankuar se industria e kanabisit u ka marrë punonjësit.
Me qindra biznese janë detyruar të ulin qepenat e të dorëzohen përballë konkurrencës së pandershme të financuar me paratë e drogës, që pastrohen në Shqipëri me vullnetin qeveritar.
Surpriza nuk kishte, Kryeministri shqiptar i qëndroi versionit të “analistëve” me pagesë në studiot televizive se përgjimet e “Ndranghetas” janë muhabet mitomanësh dhe nuk ka asgjë të vërtetë në këtë histori.
Pa u harruar mirë mbrojtja që Rama i bëri “Ndranghetas”, rezultoi se me firmën e tij si Ministër i Jashtëm janë kryer blerje nga kjo ministri në dyqanin “Gallo Albania”, në pronësi të Antonio Gallos, “Princit” sipërmarrësit italian të arrestuar si biznesmeni që do merrte përsipër pastrimin e parave të “Ndranghetas” në Shqipëri.
Siç faktohet në dokumentin nga Thesari i Shtetit, shihet se në datën 22 dhjetor 2020, Ministria për Evropën dhe Punët e Jashtme të Shqipërisë, ka porositur e blerë rroba pune, te dyqani “Gallo Albania” me vlerë 44 mijë lekë.
Qeveria shqiptare, ndryshe nga ç’deklaroi në lidhje me klanin “Ndangheta”, ka lidhur kontrata financiare me dyqanin që “Princi”, Antonio Gallo ka hapur në zemër të ish-Bllokut në kryeqytetin shqiptar.
Sipas dokumentit zyrtar, Proces-Verbali i Kërkesës Nr. 14, është nënshkruar më 22.12.2020 datë në të cilën është bërë edhe Fatura e Blerjes Nr. 270 me Nr. Serie 93733439.
Kaq mjafton që SPAK të thërrasë të parin Kryeministrin shqiptar, me firmën e të cilit paratë e taksapaguesve shqiptar kanë shkuar në llogaritë bankare të “Ndranghetas”, klanit mafioz më gjakatar në Evropë.
