Ambasadorja e SHBA-ve në Shqipëri, Yuri Kim u bën një tjetër thirrje partive politike për t’u angazhuar që në listat zgjedhore të 25 Prillit të mos përfshijnë elementë të korruptuar dhe kriminalë.
Pas reagimit të kryeministrit Edi Rama, i cili do të deklaronte se nuk ka nevojë që t’ia kujtojë ambasadorja punën e tij, diplomatja amerikane, përmes një postimi në Twitter i përgjigjet shefit të qeverisë.
“Liderët e partive nuk duhet të pastrojnë listat e tyre thjesht sepse disa ambasadorë thanë kështu ose sepse e kanë bërë të qartë se korrupsioni është një përparësi. Ata duhet ta bëjnë atë sepse kërkohet nga ligji shqiptar dhe që pritet nga një aleat i NATO-s dhe aspirant i BE-së dhe është një shenjë themelore e respektit për votuesit”, shkruan Kim.
Në mënyrë të përsëritur, ambasadorja amerikane Yuri Kim u ka bërë apel drejtuesve të partive politike në vend, që të mos kandidojnë persona me rekorde kriminale apo të korruptuar në zgjedhjet e ardhshme. Por, ky apel duket se nuk i ka shkuar për shtat kryeministrit Edi Rama. Ky i fundit, në një prononcim për gazetarët të Hënën tha se partitë mjaftohen vetëm me vetëdeklarimin e kandidatëve dhe la të kutohet se PS nuk do të bëjë verifikime të mëtejshme të tyre.
“Ne kemi ligjin, zbatojmë ligjin. Përgjegjësia e kujtdo që gënjen në vetëdeklarim është përgjegjësi individuale jo partie. Partitë nuk janë drejtori policie, verifikojnë në bazë të ligjit dhe sipas ligjit i kemi bërë verifikimet gjithmonë. S’kemi ndërmend të ngremë salla torturash në selitë e partive nëse dikush fsheh diçka. Ne shohim dokumentacionin në dispozicion”, theksoi Rama.
Qëndrim të cilin e theksoi dhe një ditë mëparë.
“Unë s’kam nevojë të ma thotë ambasadorja amerikane detyrën time,” deklaroi Rama.
“Nuk e kuptoj dot akoma, 30 vjet pasi e kem i zgjedhur një sistem të përgjegjësisë individuale para ligjit t’i kërkohet partive politike e kryetarit të mbajnë përgjegjësi pse njëri apo tjetri del se ka gënjyer, se kuptoj ca duhet të bëj unë e një parti politike në Shqipëri, si të penetrojë nëpër zgafellat e dokumenteve që bota i ka të mbyllura, se s’ka në Evropë një ligj si ky”, pyeti ai në mënyrë retorike.
