Deputeti socialist Ulsi Manja, emri i të cilit është në përgjimet e dosjes 184, lidhur me manipulimin e zgjedhjeve në Dibër, ka komentuar mesazhet e prera të ambasadores amerikane, Yuri Kim, drejtuar liderëve të partive politike shqiptare për t’u paraqitur me kandidatë të pastër në zgjedhje.
Deputeti socalist, i cili kryeson sot Komisionin e Ligjeve, është një nga ligjvënësit e kapur në përgjimet e publikuara nga Bild, të cilat zbardhin skemën e manipulimit të zgjedhjeve, ku përfshihen jo vetëm drejtues të institucioneve, shefa policie, por edhe djemtë “problematikë”.
Ndoshta edhe për këtë fakt, Manja, mund të përfshihet te ato politikanë që mund të jenë në konflikt interesi me atë mesazhin, kërkesën apo ultimatumin e diplomates amerikane, ndaj liderëve të partive politike, ku duket se më i shqetësuari është Edi Rama.
Manja, në studion e Real Story, thotë se është më se normale që ambasadorja e SHBA të ngrerë alarmin për zbatimin e ligjit të kriminalizimit, teksa ai garanton se PS jo vetëm do e zbatojë këtë, por do bëjë dhe filtrin moral.
Sipas tij, jo vetëm PS por të gjitha partitë janë të interesuara që në këto zgjedhje të paraqiten me kandidatë potencialë, por partia e tij kërkon një mandat të tretë dhe e ka të nevojshme sepse është tashmë një raport i ri me zgjedhësit.
“Z.Rama, e çdo kandidat ka detyrimin të plotësojë kushtet e ligjit 138 të vitit 2015. E kemi votuar me konsensus të plotë. Kemi rënë dakord që këtë ligj mos e çojë asnjë parti në Gjykatën Kushtetuese. Jo vetëm partive kryesore. Çfarë mund të bëjnë partitë? Çdo kryetar duhet të bëjë filtrin, thelbi është vetëdeklarimi i kandidatëve. Natyrisht edhe partia politike, një nga subjektet që mund të kërkojë filtrin është edhe kryetari i partisë politike përkatëse. Por hapi i kryetarit të partisë është deri tek paraqitja. Këtu e mbaron misioni i ligjit të dekriminalizimit.
Çfarë mund të bëjë më tepër një kryetar partie, se sa të paraqesë listën, teksa çdo kandidat pltoëson formularin. Kush do të garojë në 25 prill, këtë listë më kandidatë sigurisht me vullnetin e kandidatëve ta dorëzojë tek Prokurori i Përgjithshëm. Këtu mbaron filtri. Më pas nisin institucionet. Prokurori i Përgjitshhëm, KQZ. Jo më kot ligji e ka lidhur me formularin, pasi kur vërehet në shkelje ndërpritet mandati.
Duam një listë me kandidatë potencialë, me figura publike sepse është raport i ri me zgjedhësit. Kur them PS do e bëjë, jam i bindur se të gjitha do e bëjnë, dhe duhet të shkojnë me ofertë ndryshe përballë zgjedhësve”, tha Manja.
