Partia Demokratike ka zyrtarizuar emërimin e drejtuesve politikë në 12 qarqe, duke përmbyllur një prej fazave më të rëndësishme të organizimit në kuadrin e zgjedhjeve të 25 prillit. Tashmë si demokratët ashtu edhe socialistët, për të përmbyllur të gjithë fazën duhet të caktojnë kandidatët për deputetë.
Vëmendja e dy partive do të jetë në Shqipërinë e mesme, më konkretisht në qarqet Tiranë, Elbasan dhe Durrës, nga ku prodhohen pothuajse 50 % e mandateve të Parlamentit dhe që konsiderohen si hambaret e votave. Por jashtë vëmendjes nuk është as Fieri apo Korça, dy qarqe me peshë elektorale, ndërkohë që Lezha dhe Shkodra kanë mandatet më të shumta në pjesën veriore të vendit.
Po si do të jetë përballja mes dy partive kryesore, PD-PS në zgjedhjet e 25 prillit, bazuar te drejtuesit e qarqeve.
Në Qarkun e Tiranës, nga i cili prodhohen 36 mandate, socialistët kanë zgjedhur 3 emra: Erion Veliajn, Elisa Spiropalin dhe Ervin Bushatin.
Ndërkohë demokratët kanë caktuar Aldo Bumçin, Albana Vokshin, Flamur Nokën, Belind Këlliçin, Alfred Rushaj, Grida Duma, Jorida Tabaku dhe Agron Shehaj, të cilët janë ndarë sipas zonave të caktuara në të gjithë qarkun.
Në Durrës socialistët kanë caktuar Ardian Çelën, ndërsa demokratët nënkryetarin Edi Paloka. Ndërkohë që në Gjirokastër përballë Tritan Shehut do të jetë Bledi Çuçi, ministër i Brendshëm.
Sekretarët e Përgjithshëm të dy partive, Gazmend Bardhi (PD) dhe Taulant Balla (PS) do të përballen në Elbasan, ndërsa në Korçë, përballja është mes nënkryetarit demokrat Edmond Spaho dhe ministrit të Mbrojtjes, Niko Peleshi.
Në Shkodër, e cilësuar si bastioni i së djathtës, PD ka caktuar si drejtues qarku Helidon Bushatin, ndërsa nga PS është caktuar ish-ministri i Shëndetësisë, Ilir Beqaj.
Drejtuesit e PS dhe PD në 12 qarqe
Kukës- Safet Gjici (PS), Flamur Hoxha (PD)
Shkodër- Ilir Beqaj (PS), Helidon Bushati (PD)
Lezhë- Lindita Nikolla (PS), Mark Marku (PD)
Durrës – Ardian Çela (PS), Edi Paloka (PD)
Dibër- Olta Xhaçka (PS), Xhelal Mziu (PD)
Elbasan- Taulant Balla (PS), Gazment Bardhi (PD)
Korçë- Niko Peleshi (PS), Edmond Spaho (PD)
Fier-Gramoz Ruçi (PS), Enkelejd Alibeaj (PD)
Vlorë-Damian Gjiknuri (PS), Bujar Leskaj (PD)
Gjirokastër- Bledi Çuçi (PS), Tritan Shehu (PD)
Berat – Bledi Klosi (PS), Tomorr Alizoti (PD)
Tiranë nga PS: Erjon Veliaj, Elisa Spiropali, Ervin Bushati
Tiranë nga PD: Aldo Bumçin, Albana Vokshin, Flamur Nokën, Belind Këlliçin, Alfred Rushaj, Grida Duma, Jorida Tabaku dhe Agron Shehaj
