Partia Demokratike u shpreh sot përmes ekspertit të saj, Dorian Teliti, se ulja e taksave është një instrument për ta kthyer ekonominë në shinat e zhvillimit.
Teliti, referuar programit të kësaj partie, tha se vendosim taksën e sheshtë 9% për pagat duke ruajtur fashën e pataksuar 300 mijë lekë.
“Kursimet që krijon taksa e sheshtë mbeten ne xhepat e qytetarëve. Totali i taksave lokale e qendrore mbi biznesin e vogël, jo më shumë se 0.5% tatim mbi xhiron.
Ne po vendosim një tavan që taksat lokale e kombëtare mbi biznesin e vogël të mos e kalojnë këtë. Të gjitha bizneset fitojnë një ulje të sigurimeve shoqërore nga 24.5% në 18%”, tha ai.
Duke shpjeguar në detaje programin, Teliti paraqiti disa shembuj. Kështu sipas tij, mbi pagën mesatare 500 mijë lek të vjetra në muaj, sot një individ me taksën progresive paguan 26 mijë lek të vjetra në muaj tatim mbi pagën, ndërsa me taksën e sheshtëdo të paguajë vetëm 9% e cila përkthehet në vetëm 18 mijë lek të vjetra në muaj.
“300 mijë lekëshi i parë nuk tatohet. Tatohet çdo qindarkë mbi këtë 300 mijë leksh.
E thënë ndryshe me taksën e sheshtë 9%, me heqjen e taskës progresive çdo qytetar i cili paguhet sot me pagën bruto prej 500 mijë lekësh të vjetra do të ketë një kursim mujor prej 8 mijë lekësh ose e thënë ndryshe në vit, 96 mijë lek. Le të marrim një pagë tjetër. Pagën tuaj.
Një pagë mesatare të gazetarëve, afërsisht 100 mijë lek të vjetra në muaj.
Sot ju të nderuar paguani 78 mijë lek të vjetra tatim mbi pagën në taksimin progresiv.
Me taksën e sheshtë 9% do të paguani vetëm 54 mijë lek në muaj. Pra në xhepin tuaj do të keni 24 mijë lek më tepër para të cilat ju nuk do t’i paguani më për të shkuar për kontrata konçesionare, për shpenzime luksi, për shpenzime operative, absolutisht të panevojshme, para që do të ngelin në xhepin tuaj, para që do të mbeten për konsumin tuaj të përfitshëm.
Besoj se është e qartë. Ruhet fasha përjashtuese prej 300 mijë lekësh të vjetra, ulet nga 13 dhe 23 % dhe vendoset taksë e sheshtë prej vetëm 9%”, tha ai.
Lidhur me biznesin, Teliti mori si shembull një fast food, në qytetin e Tiranës, i cili ka një xhiro 110 milionë lek të vjetra. Teliti tha se përveç faktit që s’do të paguajë TVSH, vetëm taksa lokale të deklaruara me fatura, që na i kanë dorëzuar këtu në selinë e PD-së, paguan 1 milionë e 170 mijë lek për taksë pastrimi, për taksë tabele, për tarifa të ndryshme, për taksën arsimore e kështu me rradhë.
Me propozimin tonë, sqaroi Teliti, ky biznes dhe të gjithë bizneset e tjera nuk do të paguajnë më tepër, që janë të ngjashëm me 110 milionë lek, jo më tepër se 550 mijë lek të vjetra në vit.
