Europarlamentari Michael Gahler në një intervistë për emisionin ‘A Show’ ka reaguar lidhur me çështjen e dhënies së portit të Durrësit për kompaninë nga Emiratet e Bashkuara Arabe.
Gjatë intervistës, Gahler është shprehur se procedura e ndjekur është në kundërshtim me marrëveshjet që ka nënshkruar qeveria dhe se ato janë shkelur.
“Pjesë e marrëveshjes së stabilizim-asociimit është që një pjesë e rregullave që zbatohen në BE, duhet të zbatohen edhe në vendet që e kanë nënshkruar. Nëse ka një pronë publike, apo një tender të shitur një infrastrukturë, në këtë rast porti i Durrësit, kjo duhet të bëhet në mënyrë të përshtatshme.
Ne kemi tendera publikë ku shumë njerëz mund të aplikojnë për të marrë portin, kështu është në interes të shtetit të marrë çmimin më të mirë dhe të ketë klauzolat më të mira, që çdo kush që është në Durrës të përfitojë në maksimum.
Nëse nuk zhvillohet ky proces, por dikush shkon në Gjirin Persik dhe arrin një marrëveshje me Arabinë Saudite, pa bërë asnjë tende apo krahasimi, mendoj se një praktikë e tillë është në kundërshtim me atë që është dakordësuar. Jam informuar se gjatë takimeve që do të zhvillohen mes Shqipërisë dhe BE-së në 1 Mars, do të ngrihet kjo çështje.
Unë e kam ngritur këtë çështje sepse dua që ju të evitoni këto lloj mënyrash. Duhet të jeni të përgatitur dhe të silleni sikur të ishit brenda BE. Të evitoni ato praktika që janë përdorur në të kaluarën’, tha Michael Gahler në SYRI TV.
Qeveria shqiptare miratoi një projektligj, i cili i lejon Ministrisë së Financave, asaj të Turizmit dhe Ministrisë së Rindërtimit të futen në negociata të drejtpërdrejta pa tender e pa garë për një kontratë koncesioni për portin e Durrësit me një kompani të përzgjedhur nga Emiratet e Bashkuara.
Kompania është “Symphony Invest Limited”, e lidhur drejtpërdrejt me pronarin e kullës Burj Kalifa, Mohamed Alabbar. Kjo kompani do të ketë të drejta afatgjata për të shfrytëzuar daljen e Shqipërisë në det, ndërsa gjithçka po kryhet pa procedurë konkurruese dhe me negocim të drejtpërdrejtë.
“Ky ligj përcakton procedurën e veçantë për negocimin dhe lidhjen e kontratës ndërmjet shtetit shqiptar dhe shoqërisë “Symphony Invest Limited”, me objekt rizhvillimin turistik të portit të Durësit”. Komisioni i negocimit të kontratës vlerëson dhe negocion me shoqërinë “Symphony Invest Limited” propozimin e paraqitur prej tyre për rizhvillimin turistik të hapësirës së Portit të Durrësit dhe harton projektkontratën finale të negociuar nga palët, shoqëruar me relacionin përmbyllës të negociatave. Komisioni i negocimit të kontratës mund të asistohet nga një konsulent, i përzgjedhur sipas një procedure të veçantë, të përshpejtuar, që miratohet nga Këshilli i Ministrave”.