Autoritetet greke njoftuan sekuestrimin e 324 kg kokainë të pastër, me një vlerë 100 mln euro, ndërsa janë arrestuar 3 persona, dy shqiptarë, njëri me pasaportë greke, dhe 1 kroat, ndërsa një tjetër kroat është shpallur në kërkim, pasi arriti t´i shpëtojë policisë.
Të tre të arrestuarit akuzohen për trafik, magazinim dhe transport të drogës si dhe përfshirje në grup kriminal.
Sipas burimeve zyrtare, të arrestuarit janë një shqiptar 37-vjeçar, një 35-vjeçar po ashtu nga Shqipëria dhe një kroat 36-vjeçar, ndërsa një person i katërt me origjinë kroate është i përfshirë në trafik. Policia i karakterizon ata si drejtues të rrjetit ndërkombëtar të trafikut.
Kohët e fundit, autoritetet greke së bashku me ndihmën e shërbimit amerikan kundër trafikut të drogës (DEA) po kryenin një hetim, i cili u finalizua me arrestimet dhe konfiskimin e drogës pasditen e së premtes, në dy automjete dhe një apartament në Selanik.
Droga duket se ka qenë e destinuar për territorin grek, ndërsa nuk dihet ende rruga e mbërritjes së saj. Dyshohet se ngarkesa arriti në Europë në një kontejner nga një vend i Amerikës Latine.
