Një deklaratë e bërë muaj nga ministri Blendi Klosi më parë se muzika përhap Covid, u bë virale në rrjetet sociale. Klosi në atë kohë duke argumentuar vendimin e Komitetit Teknik mbi mbylljen e lokaleve të natës, tha se muzika krijon atmosferën për përhapjen e Covid.
Dhe nga kjo deklaratë duket se ministri i Ramës, sot drejtues politik i PS-së në Qarkun e Beratit, duket se ka ndryshuar mendim mbi përhapjen e Covid.
Ose, ndoshta ka qenë tepër i entuziasmuar që një grup anëtarësh nga LSI iu bashkuan PS, ndërsa ministri në shkelje të masave anti-Covid ka vendosur t’i presë në grumbull.
Nga raportimet mësohet se PS iu bashkuan rreth 100 anëtarë nga Qarku Berat, të cilët Blendi Klosi i ka pritur në selinë e PS-së, edhe pse nga rregullat që miraton Komiteti teknik, nuk lejohen grumbullime me mbi 10 persona.
Klosi ka nxituar të shpërndajë teserat e reja të partisë, pa pyetur shumë për Covid, edhe pse nga raportimet zyrtare të Ministrisë së Shëndetësisë, ka një shtim të frikshëm të rasteve të reja, por edhe numrit të personave që humbin jetën.
Ndoshta ministri i Ramës ka ndryshuar mendim mbi përhapjen e Covid, por e sigurtë është se nëse do të pyetet prapë sot lidhur me muzikën, sërisht do të thotë se ajo përhap koronavirusin.
