Ambasadorët e shteteve anëtare të Bashkimit Europian miratuan sot një propozim të Komisionit Europian që parashikonte një hartë të re të zonave më të prekura nga virusi dhe kufizime qarkullimi më strikte për këto rajone, theksoi ekzekutivi europian.
Përballë kërcënimit për variante të reja të koronavirusit, Komisioni kishte prezantuar disa ditë më parë këto rekomandime, jo detyruese, që parashikojnë të dekurajojnë fuqishëm udhëtimet jo-thelbësore, duke shmangur mbylljet e kufijve ose ndalimet e përgjithshme të udhëtimit.
Ata planifikojnë të shtojnë një kategori të re të zonave në hartën europiane të shëndetit të botuar çdo javë nga agjencia përgjegjëse për monitorimin e epidemisë, ECDC.
Këto zona “të kuqe të errët” korrespondojnë me ato, shkalla e incidencës së të cilave me COVID-19 është më e madhe ose e barabartë me 500 raste për 100 000 banorë gjatë 14 ditëve.
Për këto zona më të rrezikuara, testet dhe karantina duhet të zbatohen edhe në rastin e udhëtimeve thelbësore. Sidoqoftë, përjashtime të caktuara parashikohen për banorët e zonave kufitare dhe punëtorët në sektorin e transportit.
Sipas një harte të mëparshme të ECDC, 14 vende të BE kanë pasur të paktën një rajon të klasifikuar në zonën e “kuqe të errët”.
Komisioni po përpiqet të koordinojë masat e shteteve anëtare të BE-së për të shmangur një përsëritje të skenarit të pranverës së kaluar, kur mbylljet e kufijve shkaktuan kaos në lëvizjen e personave dhe mallrave brenda BE-së dhe zonës Shengen.
Portugalia, vend i cili mban presidencën e radhës të BE-së, theksoi gjatë takimit të ambasadorëve se masa kombëtare shtesë ishin të mundshme, sipas një burimi diplomatik.
Ky vend, ku kontaminimet kanë shpërthyer, ka vendosur të ndalojë udhëtimet jo thelbësore jashtë vendit për 15 ditë.
Belgjika ka marrë një masë të ngjashme që prej të mërkurës, deri më 1 mars.
Gjermania ka parashikuar një reduktim drastik të trafikut ajror me vendet që ajo i konsideron si më të prekurar nga variantet e reja të koronavirusit, përfshirë dhe Portugalinë.
