Dorian Teliti, ekspert i ekonomisë pranë PD, gjatë një interviste të dhënë për Fax News, akuzoi Ramën për situatën në të cilën ndodhet ekonomia shqiptare. Ai tha se nga kjo katandisje që i ka bërë Rama ekonomisë i lind detyra opozitës së bashkuar për të rimëkëmbur ekonominë.
“Sot jemi përballë një dështimi të plotë, fatkeqësisht në 8 vite Edi Rama e ka katandisur ekonominë shqiptare si mos më keq si kurrë më parë dhe i lind detyra opozitës shqiptare të bashkuar për t’i dalë për zot punëve të Shqipërisë dhe për të rikthyer shinat e ekonomisë shqiptare në shinat e zhvillimit”- u shpreh Teliti.
Ndër të tjera Teliti foli për programin ekonomik të Partisë Demokratike i cili u prezantua gjatë ditës së sotme, ku sipas tij konsumatorët e energjisë elektrike do të paguajnë një çmim më të ulët për 300 kw e parë. Ai ngriti dhe shqetësimin e falimentimit të bizneseve dhe këtë e cilësoi si fatalitet nga keqqeverisja. Gjithashtu foli dhe për arsimin e lartë ku theksoi se studentët të cilët vijnë nga familje me të ardhura të ulta do të përfitojnë të arsimohen falas, ndërsa për ata studentë me rezultate të larta do tu sigurohet punë.
“Për 300 kw e parë të konsumit për konsumatorët familjarë do të kemi një ulje të ndjeshme të çmimit të energjisë elektrike e thënë ndryshe do të jetë një rivendosje e fashës që ka pas qenë në të kaluarën, fashë e cila do tu vijë në ndihmë pensionistëve shqiptarë, familjeve më të ardhura të ulta, familjeve në ndihmë ekonomike dheçdo qytetari i cili sot paguan në kurrizin e tij çmimin e rritur të energjisë elektrike.
Bizneset nuk po falimentojnë vetëm në zonat rurale, por edhe në qendër të Tiranës. Ky është fatalitet dhe jo propagand. Me vullnetin e opozitës mund të realizohen të gjitha pikat e planit tonë. Programi ynë politik elektoral i përgjigjet çdo qytetari shqiptar për 5 vitet e para të jetës së tyre. Lindshmëria fatkeqësisht ka rënë për shkak të kostove.
Përsa i përket studentëve që vijnë me të ardhura të ulta do të përfitojnë falas për studim. Për studentët më të mirë do të sigurojmë punë. Do të kemi ulje të çmimit të energjisë elektrike. Do ti japim frymë ekonomisë shqiptare. Rama ka folur shumë s’ka mbajtur asnjë premtim. Rama premtoi 300 mijë vende pune, por njerëzit kanë ikur jashtë”- tha Teliti.
