Edi Rama mblodhi sot në një takim në selinë e PS drejtuesit politikë sipas qarqeve, mes të cilëve është edhe Erion Veliaj, Kryebashkiaku i Tiranës.
Veliaj u paraqit në selinë e socialistëve me biçikletë, ndërsa së fundmi janë publikuar pjesë nga përgjimet e anti-mafies italiane, që hedhin dritë mbi një skemë të pastrimit të parave të Ndragheta-s me ndërtimet në Tiranë. Nga përgjimet e publikuara del edhe emri i Kryebashkiakut Veliaj, për të cilin bashkëbiseduesit, tashmë të arrestuar në Itali, flasin për 20 % me anë të të cilave mund të sigurohen edhe lejet e ndërtimit.
Dhe përballë këtyre përgjimeve, për të cilat deri më tani Veliaj ka preferuar të përdorë batuta dhe akuza ndaj opozitës, Kryebashkiaku shfaqet me një biçikletë, ndoshta për të treguar thjeshtësinë e tij, ose për të krijuar idenë se ai nuk është Erioni i 20 %, sikundër thuhet nga përgjimet.
Gjithsesi Veliaj i është shmangur deri më tani përballjeve me gazetarët, ka shmangur pyetjet, ashtu sikundër bëri edhe sot, duke dalë nga dera e pasme e selisë, por kjo bëri që të harrojë biçikletën me të cilën kishte vajtur.
Video e mëposhtme e publikuar nga gazetarja Ambrozia Meta tregon momentin kur Lali Eri lë biçikletën në selinë e PS, del nga dera e pasme, ndërsa përpara godinës ishin disa prej mediave që edhe mund ta pyesnin lidhur me përgjimet.
Në kushte të tilla, Veliaj ka preferuar të largohet, ndërsa biçikletën ia ka marrë ndoshta një prej punonjësve të bashkisë apo truprojave.
Pamjet e mëposhtme tregojnë anën tjetër të Kryebashkiakut, atë të largimit si frikacak nga dera e pasme e selisë së socialistëve.
