Ministria e Shëndetësisë njoftoi sot se 9 pacientë, që ndodheshin në spitalet Covid, humbën jetën si pasojë e koronavirusit. Mes viktimave ishte edhe një vajzë 29 vjeçare nga Librazhdi, e cila po trajtohej në spitalin Covid2, apo sikundër njihet “Shefqet Ndroqi”.
Ndërkohë një ditë më parë humbi jetën po nga koronavirusi një 26 vjeçare nga Mati. Edhe për rastin në fjalë zyrtarisht nuk u tha nëse e reja vuante ose jo nga sëmundje bashkëshoqëruese.
Deri më tani nga epidemiologë të njohur në vend janë përjashtuar mundësitë që Sars Cov-2 të shkaktojë rrezik jete për të rinjtë, edhe pse ka pasur raportime lidhur me humbjet e jetëve në këto mosha, por që virusi ka përkeqësuar sëmundjet bashkëshoqëruese.
Prej kohësh Ministria e Shëndetësisë, e drejtuar nga Ogerta Manastriliu, ka hequr nga komunikimet zyrtare, frazat “me sëmundje bashkëshoqëruese” që shkruheshin në çdo komunikatë zyrtare në muajt e mëparshëm, në rastet kur pacientët humbisnin jetën.
Të paktën zyrtarët e Ministrisë duhet të sqarojnë se çfarë ka ndodhur me humbjet e jetëve në moshat e reja, nëse kanë pasur apo jo sëmundje bashkëshoqëruese, kanë shkuar vonë për trajtim spitalor, apo ka lidhje terapie me të cilat luftohet kundër atij që konsiderohet si “armiku i padukshëm”.
Sa u takon rasteve të reja, në të gjithë vendin janë identifikuar 538 persona Covid pozitiv, ndërsa u testuan 1918 të dyshuar.
Edhe këtë të hënë Tirana ka vijuar të ketë numrin më të lartë të infektimeve ditore me 208 raste, e pasuar nga Durrësi me 39 raste, Lushnja 36 raste, Vlora 28 raste, 27 raste në Fier dhe 20 raste në Elbasan.
Disa prej tyre janë shtruar në 4 spitalet Covid , ku po trajtohen 282 pacientë, 19 në terapi intensive dhe 4 të intubuar.
401 është numri i të shëruarve këtë të hënë. Që nga fillimin i pandemisë janë shëruar 44,291, ndërsa janë ende Covid pozitiv dhe po trajtohen kryesisht nga mjekët e familjes 27,197 persona.
