Ndrea Prendi, ish-Komandant i Gardës së Republikës, ka deklaruar mbrëmjen e sotme në Opinion se gjatë demostratës së dhunshme të 21 janarit 2011, ka pasur sulm me armë ndaj Kryeministrisë.
Prendi tha se nga maja e ish-Piramidës është hapur zjarr ndaj godinës.
“E kam parë me sytë e mi, nga maja e Piramidës është hapur zjarr ndaj godinës së Kryeministrisë. Është goditur dritarja e zyrës së Kryeministrit, është goditur me plumb blindshpues, por dritaret ishin të blinduara”, tha Ndrea Prendi.
Sipas tij, Prokuroria e Shtetit nuk ka bërë asnjë hetim lidhur me goditjen e dritares së Kryeministrit, ndërsa dritarja e goditur ishte ajo që përkon me tavolinën e punës së Kryeministrit.
“Ka pasur sulme me gurë, motolov dhe armë. Kishim informacione që demostrues kishin armë dhe lëndë plasëse ushtarake. Nuk janë bërë hetime lidhur me këto raste”, tha Prendi.
Sipas tij, demostruesit që sulmonin Kryeministrinë nga ana e Piramidës, kryesoheshin nga ish-komandanti i Njësisë Speciale të Gardës, i cili ka qenë për 25 vjet në atë funksion.
