Ndërkohë që të gjithë liderët europianë, përfshirë edhe ata të Ballkanit, po bëjnë të pamundurën për të siguruar sasi të mjafueshme dozash vaksine për të gjithë popullatën, kryeministri i Shqipërisë, Edi Rama, u mjaftua vetëm të siguronte vaksinën e tij.
Deri në këto momente asnjë nga liderët europianë nuk e ka bërë vaksinën dhe po respektojnë radhën, duke pritur që më parë të vaksinohen kategoritë më të rrezikuara siç janë moshat e treta.
Edhe miku i Ramës, presidenti i Serbisë, Aleksandar Vuçiç, nuk e ka bërë ende vaksinën, madje ai ka shtuar se personalisht do të provonte dhe vaksinën kineze, por për momentin po respekton radhën pasi është koha që të vaksinohen ata që kanë më shumë nevojë.
Madje Vuçiç ka sulmuar ashpër personat që përfitojnë nga pozitat shoqërore të cilët pavarësisht se nuk kanë asnjë problem shëndetësor nxitojnë të bëjnë vaksinën.
“Unë do të merrja vaksinën kineze, por mendoj se nuk jam aq i moshuar, sepse mendoj se është turp kur shoh se ka disa që nuk kanë ndonjë sëmundje tjetër, dhe shtyjnë veten të marrin vaksinën,” tha Vuçiç para mediave.
I tillë është rasti i kryeminsitrit të Shqipërisë Edi Rama, i cili ishte personi i dytë në vend që mori vaksinën anti-Covid edhe pse sasia e dozave të ardhura ishte shumë e vogël.
Edhe pse kryeministri Rama nuk ngeli ditë e orë pa dalë në media duke u shitur para shqiptarëve si hero që do tu siguronte vaksinën, ai tregoi se e vetmja gjë që i interesonte ishte vetja e tij, këtë e tregoi menjëherë sapo vaksinat mbërritën në Shqipëri.
Kujtojmë që kryeminsitri Rama dhe rilindasit i sollën vaksinat vetëm dy ditë pas skandalit të madh që u bë publik në media siç ishte darka e luksit e ministrave shqiptarë në Dubai.
Madje vetë Rama dhe ministriat e tij mbajtën sekret edhe vendin e origjinës së vaksinave, aq sa në vend janë ngritur dyshime të forta mos vaksinat erdhën përmes grupeve kriminale.
Ka qenë Interpol i cili ka ngritur alarmin se vaksinat po shiten në treg të zi nga grupet kriminale, të cilat krahasa trafikimit të drogës bëjnë dhe trafikimin e vaksinës.
Por pavarësisht se si dhe nga erdhën vaksinat në Shqipëri, ajo që të bën më shumë përshtypje është egoja e Ramës, i cili është i vetmi lider në Ballkan që nuk priti të vaksinohej populli, por shkoi vetë i pari të merrte vaksinën, duke ndjekur shembujt e Putinit dhe të Erdoganit, dy liderë të etiketuar si diktatorë dhe autoritarë.
Rama nuk mund të krahason madje as me Aleksandar Vuçiç, ku siç lexuat më lart është shprehur se i pari vjen populli dhe pastaj politikani.
Gjithsesi i vetmi justifikim që mund të nxjerrë Rama para qyetetarëve shqiptarë, është se e provoi vetë i pari vaksinën për t’i treguar popullit se nuk ka çip brenda saj, justifikim të cilin edhe ithtarët më të zjarrtë të rilindjes vështirë se do të mund ta besonin, madje as vetë konspiracionistët shqiptarë. /Taulant Halili/ Boldnews.al
