Nga Boldnews.al
Në javën e fundit të Dhjetorit 2020, ndërmarrja e Ujësjellës-Kanalizimeve të Sarandës ka shpenzuar plot 239 milionë lekë të vjetra, duke krijuar dyshimet se fondet publike kanë nisur të likujdohen me shumicë në prag të fushatës elektorale.
Referuar të dhënave të “spendingdata.al”, rezulton se Ujësjellësi i qytetit më jugor të Shqipërisë ka kryer 5 pagesa, për një shifër prej afro 230 mijë dollarë amerikanë.
Këta pagesa janë kryer duke nisur nga data 23 Dhjetor e deri në datën 29 Dhjetor 2020, kohë kur qytetarët shqiptarë, përfshirë edhe ata sarandiotë, po mundoheshin të mbyllnin një vit shumë të vështirë financiar, si pasojë e Covid-19.
Por, ndërkohë që qytetarët janë treguar shumë të kujdesshëm, për të ulur shpenzimet e tyre në maksimum për shkak të të ardhmes së pasigurt, institucionet publike duket se nuk e ndjejnë aspak nevojën e menaxhimit financiar.
Sipas të dhënave të Thesarit të Shtetit, Ujësjellësi i Sarandës ka kryer gjatë vitit 2020 në total 7 transaksione me kompanitë private.
Prej këtyre transaksioneve, 5 janë kryer vetëm në pak ditë, në fund të vitit që lamë pas. Ndërkohë, dy transaksione të tjera, me vlera më të vogla, janë kryer përgjatë të gjithë vitit.
Kjo mënyrë menaxhimi fondesh publike ngre pikëpyetje më së pari për efikasitetin e ndërmarrjes së Ujësjellësit të Sarandës.
Por, pikëpyetja më e rëndësishme është përdorimi “masiv” i fondeve publike në vetëm pak ditë, në fund të vitit, në prag të fushatës elektorale.
Përdorimi i financave shtetërore në fushata elektorale është një shqetësim i ngritur shpesh në raportet e organizmave ndërkombëtare të angazhuar për monitorimin e zgjedhjeve në Shqipëri.
E, megjithatë, pavarësisht premtimeve qeveritare për të respektuar rregullat e drejta politike, por edhe miratimit të normave ligjore që teorikisht duhet të pengojnë abuzimin me “investime elektorale”, duket se asgjë nuk e ndalon maxhorancën që të shpenzojë pa fund para, me shumë mundësi në funksion të fushatës zgjedhore që i paraprin votimeve të 25 Prillit 2021.
