Banorët e Sarandës, një nga qytetet elitare të turizmit në Shqipëri, po kërkojnë prej vitesh rikthimin e një spitali funksional.
Megjithëse gjatë viteve të fundit kanë ndodhue shumë skandale, ku janë regjistruar disa vdekje, madje edhe të fëmijëve, sërish nuk është bërë asnjë gjë për rikthimin e bluzave të bardha.
Lyerja e mureve dhe fasadave nuk ndihmon banorët e Sarandës, popullsia e të cilës dyfishohet gjatë muajve të verës. Dhe në këtë situatë, Alket Hyseni, deputet i Partisë Socialiste, “mburret” për ardhjen e një autoambulance, e cila do të transferojë pacientët nga Spitali i Sarandës drejt Vlorës, Gjirokastrës apo Tiranës.
Gjendja e mjeruar e spitalit lokal ka deryruar banorët të kurohen edhe në Greqi, kryesisht në Igumenicë dhe Janinë. Por, për “Beun e Jugut” ardhja e një autoambulance do të rregullojë situatën.
Ai thotë se “spitalit të Sarandës i shtohet edhe një autoambulancë e re, moderne, e pajisur me të gjitha aparaturat dhe medikamentet e nevojshme për urgjenca dhe transferim pacientësh”. Propaganda e tij vijon me filozofinë e Rilindjes.
“Ndryshimi ynë dhe filozofisë sonë të zhvillimit dhe modernizimit, me epokën dhe filozofinë e kundërshtarëve politik është i qartë, si ndryshimi i këtij mjeti bashkëkohor me furgonët karakatinë dhe pa asnjë standart të kohës PD/LSI”, thotë ai, por pa përmendur gjendjen skandaloze të Spitalit Lokal të Sarandës.
Por, çfarë bëri Hyseni gjatë këtyre 8 viteve në pushtet për funksionimin e këtij spitali?
Përse e kategorizoi spitalin vetëm lokal, kur në fakt, Lushnja dhe Pogradeci, megjithëse i kanë spitalet lokale, i kanë të pajisur me aparatura dhe me staf shumë herë më të madh.
Në Sarandë mungojnë mjekë urgjence, kardiologë, pediatër, për të vazhduar me endokrinologë, okulist apo edhe gjinekologë. Pra, mjekë utilitarë që duhet tu vinin në ndihmë banorëve të shumtë të Sarandës, Delvinës, Ksamilit e deri në Konispol.
Aktualisht, banorët rrezikohen edhe nga kryerja e një operacioni të thjeshtë për apendicitin, ku duhet të udhëtojnë për në Vlorë për ta kryer operacionin. Nuk shkojnë në Gjirokastër, pasi nuk i “lejon” politika e Hysenit që ka vendosur se pacientët duhet të kurohen në Spitalin Rajonal të Qarkut, që është në Vlorë. Plot 3 orë larg.
“Mburrjeve” dhe “arritjeve” të Hysenit iu përgjigj Jolio Dine, anëtar i Këshillit Kombëtar të Partisë Demokratike, i cili ngre pikërisht pyetjen; a është arritje shtimi i një ambulance?! Më tej ai kujton edhe një ndodhi. “Sot në mëngjes teksa shkoja për në punë, më trëmbi historia e një miku që më tregoi se një i afërmi i tij ishte detyruar të shkonte në Vlorë për të operuar as më shumë e as më pak por apandesitin!”.
Sipas Dines, në spitalin e Sarandës nuk kishte staf mjaftueshëm për të kryer operacionin! S’kishte kirurg, anestezist e madje personel mbështetës. Më pas, Dine ngre një tjetër shqetësim; po pse në Vlorë e jo në Gjirokastër?
“Sepse duhet të shkosh brenda qarkut ishte përgjigja! Por, edhe sikur stafi të mungonte për 1001 arsye të tjera, por edhe sikur arsyeja pse e orientuan në Vlorë mos të ishte kjo… O Zot ishte një njeri që rrezikonte!” shkruan ai. Më tej ka një lutje për të gjithë.
“A mundet që dikush të kthejë sytë nga Spitali ku shërbyen për vite e vite me radhë një plejadë e tërë Profesor Doktorash. A mund të bëhemi bashkë, as unë e as ti, por mendje intelektuale me profil mjekësor e administrativ, nga të gjitha partitë e ndoshta pa parti fare, e të ulemi të diskutojmë çfarë do bëjmë për t’i rikthyer dinjitetin Spitalit me emrin e rëndë “Petro Nako”? Boll më me justifikime. Shëndeti nuk pyet për ngjyra” përfundon Dine.
