Dita e djeshme ka qenë aktive për klubet e Kategorisë Superiore. Tre klubet që lëvizën në merkato ishin Bylisi, Teuta dhe Vllaznia.
Teuta arriti marrëveshjen me Jackson, brazilianin, që në sezonin 2018-19 ka luajtur me Luftëtarin në Superiore dhe bënte shumë mirë.
Burime pranë klubit durrsak pranojnë arritjen e marrëveshjen dhe konfirmojnë se mbrojtësi 29-vjeçar ka firmosur deri në fund të sezonit.
Gjatë sezonit të fundit Jackson ishte pjesë e Gjilanit, ku luajti 17 ndeshje dhe dhuroi një asist. Ndërkohë Bylisi ka arritur të sigurojë shërbimet e Kreshnik Nebihut.
Gazeta Olle mëson se mesfushori e ka mbyllur me Trepça 89 dhe së shpejti do zbarkojë për t’u prezantuar në Ballsh. 23-vjeçari luan edhe si mbrojtës qendre dhe është përforcim me shumë vlera për ballshiotët.
Superiorja nuk është e panjohur për Nebihun sepse në të shkuarën ai ka luajtur me Flamurtarin. Pjesën më të madhe të karrierës, Nebihu e ka kaluar në Dardani.
Nga ana tjetër, Vllaznia kryesuesja e Superiores ka zyrtarizuar ish-sulmuesin e Bylisit, Anxhelo Radovani. Ai rikthehet te kuqeblutë pas një aventure të shkurtër në Ballsh. Me Radovanin është firmosur një kontratë trevjeçare dhe fillimisht do të luajë me ekipin e 21 vjeçarëve, por duke qenë vazhdimisht në vëmendjen e stafit të ekipit të parë.
