“Ne jemi në koalicion jo vetëm me PD, por me të gjitha partitë që po kvrkojnë sot largimin e Edi Ramës”, u shpreh Monika Kryemadhi, kryetare e LSI-së. Sipas saj, më i rëndësishëm sesa koalicion me PD dhe këto parti, është koalicioni me shqiptarët.
Kryemadhi tha se për zgjedhjet e 25 prillit lista e LSI do të përfshijë edhe parti tradicionalisht të majta që sot ndodhen të rrjeshtuara në kampin opozitar.
Kryetarja e LSI nuk bëri të njohura se cilat janë këto parti, por tha se në 25 prill opozita e bashkuar do të përfaqësohet më së miri.
“Fryma është ajo që krijon numrin më të madh të mandateve dhe jo listat. Ju mendoni se nëse një listë e vetme do të bënte që opozita të shpallej fituese dhe Edi Rama do të shkelte Kushtetutën do të hynte në konflikt me BE dhe SHBA, pra mendoni se Rama do të favorizonte opozitën? Jo, s´ka lidhje me sa lista përfaqësohesh, duhet fryma”, tha Kryemadhi.
Sipas saj, fronti opozitar me fuqinë e dy listave, do të çojë 280 kandidatë në zgjedhje, që do të thotë se do të mbledhë më shumë vota dhe do ketë më shumë mandate.
Kryemadhi tha se nga LSI është mandatuar Petrit Vasili, i cili po ndjek me vëmendje maksimale gjithë procesin e bashkëpunimit mes partive opozitare.
“Unë kam folur me zotin Basha para disa kohësh lidhur me disa nga pikat, por Petrit Vasili është mandatuar për negociatat”, tha ajo.
