“Negociatat me aleatët po vijojnë dhe shumë shpejt do të ketë një deklaratë nga grupi negociator”, u shpreh kreu demokrat Lulzim Basha, pa dhënë detaje lidhur me shkaqet sepse deri më tani nuk është arritur një marrëveshje mes PD dhe PR së drejtuar nga Fatmir Mediu apo PDIU-së së drejtuar nga Shpëtim Idrizi.
Grupi i negociatorëve të PD përbëhet nga Gazmend Bardhi, Sekretar i Përgjithshëm, Edi Paloka, nënkryetar, dhe Alfred Rushaj, i cili është caktuar si drejtues i fushatës së PD në zgjedhjet e 25 prillit.
Deri më tani PD ka mbyllur negociatat me LZHK-në, ku kreu i kësaj partie do të kandidojë në një vend të sigurtë në listën e kandidatëve demokratë në Qarkun e Tiranës. Gjithashtu është arritur marrëveshje me PAA dhe PDK, ku drejtuesit e dy partive, Agron Duka dhe Nard Ndoka, do të kandidojnë në vendet e sigurta të kandidatëve në Durrës dhe Shkodër, si dhe me PBDNJ e Vangjel Dules, që do të kandidojë në Vlorë.
Fatmir Mediu dhe Shpëtim Idrizi i kanë dërguar në tryezë demokratëve shifrat e e mbledhura nga historiku i votave për forcat e tyre politike në zgjedhjet e shkuara duke pretenduar më shumë mandate të sigurta në 25 prill.
Si Mediu ashtu edhe Idrizi kërkojnë më shumë se 1 kandidat në atë që konsiderohet si lista e sigurtë e kandidatëve për deputet, gjë që duket se është refuzuar deri më sot nga Lulzim Basha.
