Ata që udhëtojnë për në SHBA, do të duhet jo vetëm të paraqesin rezultatin negativ të tamponit, por pas mbërritjes do të duhet t’i nënshtrohen karantinës 7-ditore atje.
Njoftimi është bërë nga ambasada shqiptare në Shtetet e Bashkuara të Amerikës, ku saktësohet se këto rregulla hyjnë në fuqi duke nisur që nga 26 Janari.
“Ju bëjmë me dije se që prej datës 26 janar 2021, rregullat e hyrjes përmes transportit ajror të udhëtarëve ndërkombëtarë në SHBA do të ndryshojnë. Që prej kësaj date, SHBA do të kërkojë që të gjithë këta udhëtarë të jenë testuar negativë për Covid në tre ditët e fundit përpara nisjes së udhëtimit drejt SHBA dhe të jenë të pajisur me dokumentin që verifikon rezultatin ‘Negativ’ të testit, qoftë në formë të shkruar apo elektronike, në mënyrë që ta paraqesin tek stafet e linjave ajrore’’, njofton ambasada.
“Këto stafe do të jenë të detyruar të konfirmojnë që secili udhëtar paraqet një test negativ përpara se t’i lejojnë ata të akomodohen në bordin e avionit dhe do të jenë të detyruar të ndalojnë këdo që nuk paraqet këtë dokument. Pas mbërritjes në territorin e SHBA, udhëtarët janë të detyruar të qëndrojnë për 7 ditë në karantinë, në ambientet ku do të akomodohen, dhe do duhet të testohen sërish 3-5 ditë pas mbërritjes”, sqarohet në njoftim.
Sipas Qendrës për Kontrollin e Sëmundjeve këto masa, të kombinuara me masat mbrojtëse të përditshme si mbajtja e maskave dhe distancimi social, do të bëjnë që udhëtimet të jenë më të sigurta, më të shëndetshme dhe më të garantuara për mospërhapjen e virusit në avionë, aeroporte apo destinacione.
