Nga Ilir Kalemaj
Nuk ka fakte alternative, por vetëm opinione të tilla.
Nuk ka të vërtetë përfundimtare në ligjësitë e shkencës, politikës dhe shoqërisë. Ruhuni nga profetët e rremë.
Nuk mund të jesh i lirë të bësh zgjedhjet e tua përfshirë ato politike, pa liri ekonomike.
Nuk mund të ketë barazi të ardhurash por vetëm mundësish apo shansesh të barabarta. Këtë e siguron vetëm një shtet i së drejtës, një sistem politik demokratik dhe një sistem ekonomik kapitalist.
Premtimet politike shpesh duhen marrë si metafora apo sic ndodh rëndom në Shqipëri: si batuta me të cilat mund të gajasesh.
Propaganda është të përsërisësh fjali të thjeshta dhe gënjeshtra të mëdha deri sa të bëhen bindëse.
Thonë që qeveria është mesatarja e inteligjencës së popullit nga del. Por është dhe mesatarja e virtyteve dhe veseve të tij. Nga ferra nuk mund të dalë trëndafili dhe anasjelltas.
Një qeveri e mirë është ajo që mendon pak për vete dhe shumë për shoqërinë. Një qeverisje e mirë është ajo që lë sa më pak vend për përvetësim fondesh publike dhe lë sa më shumë të holla në xhepat e qytetarëve.
Individi sado impakt të ketë nuk mund të korruptojë dot sistemin. Por është sistemi ai që korrupton individin. Natyrisht vetë sistemi është shumatore individësh por edhe rregullash dhe ligjësish.
Korrupsioni nuk është fe por ka më shumë pasues dhe se vetë fetë tradicionale. Pa dallime ideore apo krahinore.
Sa më shumë shtohet informacioni, aq më pak lexohet dhe akoma më pak kuptohet gjësendi.
Vetëm dija të bën të lirë.
