Nga boldnews.al
Ka shkaktuar mllef dhe zemëratë një video e shfaqur, ku një sanitare e spitalit “Shefqet Ndroqi”, shtiret si infermiere dhe arrin t’i marrë rreth 8 milionë lekë të vjetra një vajze e cila kishte të shtruar nënë e saj me covid. E reja dha shumë para që mjekët e infermierët të kujdesheshin për të ëmën edhe pse e dinte që sipas kryeministrit tonë “shëndetësia është falas”.
Tirja është arrestuar, madje duke e përbuzuar edhe drejtuesit e spitalit dhe mjekët të cilën e qasnin Tiren e “tyre” të dikurshme brenda pavionit ku ishin të shtruar pacientë me covid, ndonëse ajo ishte pastruese në një pavion tjetër. Por historia e Tires përfundon këtu. Ajo tjetër hiqej dhe tjetër ishte, duke e veshur veten jo me bluzen e sanitares, por atë të mashtrueses.
Një histori të ngjashme si me emblemën Tire, po kalojmë që nga momenti i mbërritjes së vaksinës dhe deri më tani. Me shumë urgjencë, tre ditë më parë mbërriti në Shqipëri një kuti me vaksina prej 975 dozash të kompanisë Pfizer. Ende nuk dihet vendi që e ka sjellë, pasi kjo vaksinë që duhet të kalonte në çdo rrjet sigurie dhe trasnparence, mbërriti dorazi, në formë klandestine.
Aty u shfaq kryeministri ynë që mban postin e kreut të qeverisë, por u shtir si Tirja, duke bërë rolin e epidemiologut, aktorit që merrte vaksinën me mëngët perveshur, vendosjes së nusepashkës në gjoks dhe batutave pas marrjes së vaksinës.
E gjitha një mashtrim, jo vetë vaksina, por forma si mbërriti, arsyeja se përse u detyrua ta sillte me aq axhale dhe më pas propaganda. Ka tre ditë që vaksinohet ndonjë mjek, por për tre ditë rresht kryeministri shëtit në stadiumin “Air Albania”, një bina e madhe e cila është kthyer si “qendër spitalore”.
Tirja sanitare dhe “Tiri ynë” ndryshojnë shumë. Ajo mashtroi për t’i rrëbyer një vajze për nënë e sëmurë duke i marrë 8 milionë lekë dhe në fund nuk e pati problem ti thontë se “nëna të vdiq”, ndërsa “Tiri ynë”, ka tjetër formë. Ata të dy bashkohen në mënyrën e mashtrimit.
Dikush mashtron për të përfituar shuma lekësh, qofshin ato edhe para gjaku dhe dikush tjetër për të përfituar vota, për të rrëmbyer pushtetin politik dhe natyrshëm atë ekonomik. Gjendemi në duart e “Tirëve” që sot edhe edhe pandeminë e kanë kthyer në biznes aferash.
Tirja mashtron për ndonjë lek afere në xhep, për tu derdhur më pas në ndonjë dyqan për tu dukur “zonjë”, ndërsa të tjerë për të dhënë Shqipërinë me konçesion dhe në fund të dalin shëtitje në emër të vaksinës që më shumë se mënyrë për tu mbrojtur nga coronavirusi, është formë për të përfituar elektoralisht.
