Në Komisionin Qendror të Zgjedhjeve janë shtuar denoncimet lidhur me abuzimet e funksionarëve të Qeverisë, deputetëve, madje edhe Kryeministrit, duke përdorur burimet shtetërore për takime partiake, në kuadrin e zgjedhjeve të 25 prillit.
Pavarësisht se fushata nuk ka nisur zyrtarisht, bazuar në aktin normativ të KQZ, 4 muaj nga 25 prilli, nuk lejohet përdorimi i aseteve shtetërore, apo çdo lloj propogande, kundrejt shtresave të caktuara, përfshi këtu edhe procesin e rindërtimit, që është kthyer në një show lidhur me dhënien e çelësave të banesave të reja nga kryebashkiaku Erion Veliaj, Kryeministri Edi Rama apo ministrat e tij.
Një kallëzim specifik është bërë për kryeministrin Rama, i cili shfaqet në aktivitete shtetërore dhe jo partiake me maskë që shkruhet qartë PS.
“Kryeministri përdor siglën e PS ne aktivitete zyrtare shtetërore, gjë qe automatikisht e bën aktivitetin me natyre partiake. Sigla e PS është përdorur ne çdo dalje te kryeministrit ne aktivitete me fonde shtetërore, ne Tirane, Vlore, Shijak dhe Durres”, thuhet në denoncim.
Një tjetër denoncim është bërë për portalin qeveritar shqipëriaqëduam.al.
Denoncuesi evidenton faktin se portali zyrtar shtetëror ka ne sfond kryesor nje miting elektoral te PS, me mbi 35 flamuj te subjektit politik Partia Socialiste.
“KQZ ka përgjegjësinë te ndërhyrje dhe te kërkojë zbatimin e ligjit, duke detyruar qeverinë dhe çdo institucion te heqë flamurin partiak nga portali kryesor i qeverise shqiptare”,-thuhet në denoncim.
Edhe LSI ka bërë 16 kallëzime për kryeministrin, ministrat dhe kryebashkiakët, sidomos mbi rolin e tyre në procesin e rindërtimit.
Ndërsa Partia Socialiste ka përgatitur një udhëzim për deputetët, të cilëve ju shpjegon se kush janë aktivitetet e ndaluara në këtë periudhë dhe i porosit në mënyrë të veçantë të kenë kujdes se çfarë të postojnë në rrjetet sociale.
Më herët u denoncua deputeti Alket Hyseni, i cili me datën 6 janar, në një takim partiak, u shfaq me drejtuesit e policisë së Sarandës, të cilëve ligjërisht u ndalohet të jenë pjesë e partive.
