Këngëtari i njohur Arkimed Lushaj, i cili ndryshe njihet me emrin artistik “Stresi”, është në kërkim policor për protestat e dhunshme që shpërthyen para Vitit të Ri.
Reperi ndonëse u shpall në kërkim doli publikisht dhe ofendoi kryeministrin Rama, e më pas e kërcënoi, duke i bërë thirrje që t’i dorëzonte kreun e Policisë së Shtetit, Ardi Veliun.
Ai pas protestave për vrasjen e Klodjan Rashës nga një efektiv policie, protesta që tha se ishte ai organizator, vizitoi disa shtete. Aktualisht ndodhet në Britaninë e Madhe.
Stresi sot ka publikuar disa video dhe shkrime në Instagram, ku duket se është tepër i revoltuar me miqtë e tij, që sipas këngëtarit e kanë lënë në baltë.
Arkimedi i ka shpallur “luftë” dhe u ka bërë dalje, madje i “kërcënon” duke iu thënë se nuk do mund të kalojnë dot as urën e Kukësit.
