Komisioni Qendror i zgjedhjeve ka gjobitur me një shumë qesharake, kreun e Kadastrës Lushnje, Arben Qalliu. Shuma që duhet të paguajë Qalliu është 1,500 lekë gjobë, ose sa gjysma e gjobave që vendos policia ndaj qytetarëve që nuk mbajnë maska në ambientet publike.
Qalliu u gjobit pasi deputeti i Partisë Socialiste, Bujar Çela, u shfaq në media duke shpërndarë leje legalizimesh.
Kreu i KQZ, Ilirjan Celibashi është shprehur se veprimet e drejtorit rajonal janë në kundërshtim me ligjin, pasi shërbimet kadastrale bëhen vetëm në sportel.
Po ashtu, Celibashi është shprehur se lejet nuk duhej të viheshin në mbështetje të partive apo të kandidatëve.
“Drejtori nuk solli asnjë prove që shpërndaja e lejeve të legalizimit ishte bërë sipas ligjit. Veprimet e kryera prej tij dhe stafit të tij kanë kontribuar në kundërshtim me ligjin për kadastrën, duke u krijuar mundësi subjekteve politike ta kryejnë këtë proces në funksion të interesave të tyre”, tha Celibashi.
Gjithsesi shumat qesharake të gjobave tregojnë se sa seriozisht e ka marrë KQZ respektimin e aktit normativ të miratuar nga ajo vetë. Aplikimi i gjobave të tilla jo vetëm nuk do të parandalojnë përdorimin e aseteve shtetërore në fushatë, por përkundrazi mund të shtojnë rradhët e atyre zyrtarëve që me qejf të madh mund të shkelin ligjin, për ti rënë në sy partisë.
