Kryetarja e Komisionit Qendror të Zgjedhjeve, Valdete Daka nuk ka treguar nëse kreut të LVV-së, Albin Kurtit do t’i jepet mundësia për t’i hyrë garës për deputet, bazuar në aktgjykimin e fundit të Gjykatës Kushtetuese.
Daka ka thënë se kjo do të vendoset pas pranimit të listave nga partitë politike.
“Unë do të privohem nga përgjigjja sepse në KQZ do të vendoset. Këtë do ta vendosim pasi ta kemi listën e kandidatëve për deputet dhe pasi ta verifikojmë nga Këshilli Gjyqësor se kush ka dënime dhe kush jo dhe vetëm pastaj do ta vendosim. Unë nuk i komentoj deklaratat e politikanëve, të asnjërit, jo vetëm të Glauk Konjufcës. Por gjithsesi se KQZ do ta zbatoj Kushtetutën dhe Ligjin për Zgjedhje të Përgjithshme”, ka thënë Daka në një intervistë për Top Channel.
