Opozita e bashkuar e drejtuar nga PD dhe LSI, ka të njëjtin qëndrim lidhur me aplikimin e teknologjisë në zgjedhje.
Kështu pas PD e cila i ka propozuar KQZ aplikimin e teknologjisë për votimin dhe numërimin elektronik në dy qarqe, Fier dhe Korçë, edhe LSI ka propozuar nga ana e saj të njëjtat qarqe.
Ndërkohë, Partia Socialiste nuk ka bërë asnjë propozim në KQZ lidhur me aplikimin e teknologjisë në zgjedhje dhe nuk dihet nëse ajo do të mbështesë ose jo aplikimin në këto qarqe.
Komisioneri Shtetëror Ilirjan Celibashi u shpreh se projekti pilot për teknologjinë në zgjedhje do zbatohet në 20% të zonave, pikë kjo e dakordësuar në Këshillin Politik.
Për të vendosur se në cilat zona zgjedhore do zbatohet projekti pilot për të mundësuar numërimin dhe votimin elektronik, do duhet konsensusi i palëve politike.
“Z. Komisioner, në përgjigje të shkresës suaj nr. 2646. datë 28. 12.2020 mbi zbatimin e teknologjisë në zgjedhjet e datës 25 Prill 2021 për Kuvendin e Shqipërisë, ju bëjmë me dije se opinioni i Partisë Demokratike është që projekti pilot për votimin dhe numërimin elektronik të realizohet në qarqet Fier dhe Korçë”, thuhet në shkresën e dërguar nga PD që mban firmën e sekretarit të Përgjithshëm të kësaj partie, Gazment Bardhi.
Një shkresë të ngjashme, KQZ i ka dërguar edhe LSI, e cila kërkon aplikimin e teknologjisë në zgjedhje, pikërisht në këto dy qarqe.
