Klubi i Partizanit mori dje një fitore të madhe kësaj radhe jashtë fushave. CAS i dha të drejtë klubit të kuq duke zhbllokuar merkaton e transferimeve.
Kujtojmë që prej disa muajsh, Partizani ishte në gjyq kundër FIFA-s, që kishte marrë në konsideratë apelimet e Alaves dhe Istras, duke e dënuar më pas Partizanin. Klubi i kuq pajtoi një studio ligjore spanjolle dhe e ndoqi deri në fund këtë çështje. Një çështje që ka filluar që në muajin korrik dhe vetëm në fillim të janarit, u dha një përgjigje sa i takon merkatos.
Gjithsesi, një tjetër çështje që ishte në CAS, ishte ajo e Çinarit kundër FIFA-s. Sulmuesi apeloi dënimin e tij me 4 muaj pezullim nga aktiviteti futbollistik, por apelimi i tij është rrëzuar poshtë, duke mos u pranuar nga FIFA.
Çinari nuk aktivizohet që nga mesi i muajit korrik për Partizanin. Mesfushori anësor ka shlyer dy javë aktivitet gjatë korrikut, për të vazhduar më pas me muajin nëntor dhe dhjetor. Deri më tani, Çinari ka shlyer dy muaj e gjysmë nga pezullimi. Në rast se aktiviteti nuk ndalet për arsye të ndryshme, Çinari do të jetë i gatshëm për Partizanin në mesin e muajit shkurt.
