Nga Boldnews.al
Dy ish-basketbollistët e maxhorancës socialiste, Edi Rama dhe Ilir Beqja, të cilët janë njëkohësisht edhe ideatorët dhe ekzekutorët e dhënies “me koncension” të Shëndetësisë, u shfaqën në ditën e parë të vitit 2021 dhe bënin thirrje sërish për “larjen e duarve”, si forma më efikase, sipas tyre, për përballimin e Covid-19.
Në mesditën e 1 Janarit, Kryeministri Rama iu doli shqiptarëve që sapo kishin mbyllur natën e ndërrimit të viteve më të trishtë në dekadat e fundit, për t’u dhënë “një lajm të madh”.
Rama tha se ai vetë dhe qeveria e tij kishin siguruar 500 mijë vaksina anti-Covid, të cilat ende nuk dihet se kur do të mbërrijnë dhe, për më tepër, është edhe një sasi fare e pamjaftueshme për nevojat e vendit.
Megjithatë, Rama e nisi vitin 2021 aty ku e la, në kamerat televizive, ku nuk harroi të këshillonte shqiptarët që të lanin duart e të ruanin distancimin social.
Këto “këshilla” të vyera i dha gjithashtu në të njëjtën ditë edhe Ilir Beqja, ish-ministër i Shëndetësisë në kabinetin “Rama 1” dhe një nga figurat më të forta brenda radhëve të Rilindjes.
Në një postim publik që shënon datën 1 janar 2021, Beqja bënte thirrje për përdorimin e ujit e sapunit, si një metodë shkencore efikase për të përballuar pandeminë globale.
Nëse zgjidhja do të ishte kaq e thjeshtë, pra tek “larja e duarve”, atëherë do të duhet të pranonim se gjysma e qeverisë “Rama”, të prekur nga Covid-19, nuk i lajnë duart. Po ashtu, pjesa më e madhe e parlamentarëve tanë, gjithashtu nuk e përdorin rregullisht sapunin.
Me të njëjtën logjikë, miliona e miliona njerëz në të gjithë botën, nga politikanë e celebritete e deri tek njerëzit e thjeshtë, gjithashtu nuk kanë larë duart e për këtë arsye kanë humbur jetën apo janë dëmtuar nga virusi Covid-19.
Për mbi 10 muaj, pjesa më e madhe e vendeve të botës e kuptuan se Covid-19 luftohej me aparatura, ku më kryesorët ishin respiratorët e bombolat e oksigjenit.
Gjithashtu, u kuptua se pandemia luftohej me këto mjete, por edhe me mjekë e reanimatorë që dinë t’i përdorin këto pajisje.
Pandemia konfirmoi atë që shumëkush e dinte-shëndetësia shqiptare është totalisht e papërgatitur për sfida të tilla. Jo se nuk ka mjekë të aftë, jo se mungojnë reanimatorët e sprovuar e infermierët humanë.
Shteti shqiptar ka pasur dhe vijon të ketë staf mjekësor të përkushtuar, edhe pse hemorragjia e trurit ka shkaktuar dëme të mëdha.
Shteti shqiptar, megjithëse i varfër, i ka financat e nevojshme për të siguruar pajisje që mbajnë në jetë e kurojnë pacientët me Covid-19.
Por, mjekët dhe stafi i tyre mbështetës nuk mund të bëjnë asgjë më shumë, kur financimet për Shëndetësinë thithen në “gropat” e koncensioneve të Shëndetësisë.
Deri më tani janë 4 kontrata koncensionare, të cilat reduktojnë ndjeshëm investimet në sektorin e Shëndetësisë, duke i përqëndruar milionat e eurove në pak duar, të gjithë të lidhur me fije me njëri-tjetrin.
Përgjegjës për këto “gropa thithëse” nuk janë as më shumë e as më pak se këta dy “të gjatët” qeveritarë, Rama e Beqja, që vijojnë të bëjnë thirrje foshnjarake për “larjen e duarve”.
Të dy, Rama e Beqja, njëri nga salla e kuruar e kryeministrisë dhe tjetri nga kolltuku i ngrohtë me kompjuter përpara i shtëpisë, vijojnë t’i përdorin shqiptarët për budallenj, kur u tregojnë “përrallën” se pandemia ikën me “ujë e sapun”.
Në një situatë pak më normale, në një vend pak më normal se ky i yni, këta dy personazhe, për shkak të “masakrës” në fondet e Shëndetësisë, më së paku do të duhet të flisnin përpara një prokurori.
Por, kjo do të ndodhte në një vend normal, ku Reforma në Drejtësi do të vendoste krijuesit e “gropave thithëse” para përgjegjësisë penale.
Deri sa të vijë ajo ditë, nëse ndonjë herë do të mbërrijë në Shqipëri, shqiptarët do të vijojnë të marrin “këshillat e vyera” me larje duarsh e distancim social.
Mjafton që të mos flitet për koncensionet!
