Eksperti i shëndetit publik, Erion Dasho, e konsideroi si një lajm të mirë, arritjen e marrëveshjes pvr sigurimin e 500 mijë doza vaksinash, por e krahasoi Kryeministrin Edi Rama me tersin e Pojanit.
Dasho shprehet se 500 mijë dozat e siguruara kanë potencialin ta zgjidhin problemin e COVID në Shqipëri dhe, nëse vijnë para verës, ato do të shmangin një sezon të tretë COVID-i në dimrin 2021-22.
“Megjithatë, të bën përshtypje një fakt i çuditshëm! Lajmi i ardhjes së vaksinës, u shoqërua me anatemimin krejtësisht të panevojshëm të Bashkimit Europian!!! Njëlloj si tersi i famshëm i gojëdhënës të cilin nuk e linte ligësia rehat pa e thënë një fjalë të keqe!”, shkruan Dasho
Postimi nga Erion Dasho
TERSI I POJANIT!
Sot kryeministri u dha një lajm të mirë shqiptarëve, sigurimin e 500 mijë dozave të vaksinës anti-COVID. Ndonëse teorikisht këto doza duhet të përdoren për 250 mijë shqiptarë, studimet e fundit tregojnë se pjesa më e madhe e të vaksinuarve zhvillojnë imunitet edhe pas një doze të vetme.
Kur kjo kontratë të nisë të zbatohet, qeveria do të meritojë përgëzime dhe vlerësim. 500 mijë dozat e siguruara kanë potencialin ta zgjidhin problemin e COVID në Shqipëri dhe, nëse vijnë para verës, ato do të shmangin një sezon të tretë COVID-i në dimrin 2021-22.
Dhe megjithatë, të bën përshtypje një fakt i çuditshëm! Lajmi i ardhjes së vaksinës, u shoqërua me anatemimin krejtësisht të panevojshëm të Bashkimit Europian!!! Njëlloj si tersi i famshëm i gojëdhënës të cilin nuk e linte ligësia rehat pa e thënë një fjalë të keqe!
Në vend që të gëzohen për vaksinën, shqiptarët sot vrasin mendjen:
Ç’nevojë pati tersi të shajë Europën ditën e parë të vitit??!!
