Projektuesi francez i modës Pierre Cardin ka ndërruar jetë në një spital në Neuilly, në perëndim të Parisit, të martën në moshën 98 vjeç, tha familja e tij.
Cardin lindi në Itali në 1922 por emigroi herët në Francë. Pierre Cardin kaloi fëmijërinë e tij në Saint-Étienne ku edhe mësoi të qepë. Ai shkoi në Paris në vitin 1945. Një vit më vonë , Christian Dior i ofroi atij një punë si rrobaqepës në shtëpinë e modës që sapo kishte krijuar. Pierre Cardin kaloi katër vjet atje para se të hapte të tijën.
Ai ishte i njohur për stilin e tij dhe modelet e së ashtuquajturës Epoka Hapësinore. Pierre preferonte forma dhe motive gjeometrike. Ai përparoi në modën unisex, ndonjëherë eksperimentale dhe jo gjithmonë praktike, çka e bëntë stilin e tij unik.
