Kryetari i Partisë Republikane, Fatmir Mediu, zhvilloi një takim me strukturat e partisë së tij në Tiranë, nga ku akuzoi kryeministrin Edi Rama se ka kapur të gjithë elementët e shtetit duke abuzuar me to.
“Të gjithë duhet të pyesim veten. A kemi liri? A kemi demokraci?A kemi standarde? A kemi respekt të shtetit karshi atyre që e votojnë? A janë pushtetarët shërbëtorë të njerëzve? Në qoftë se i shikon njerëzit nga lart dhe mendon se ti je ai që kontrollon çdo gjë dhe njerëzit nuk kanë vlerë, vetëm e shkatërron shoqërinë”, u shpreh ai.
Kreu i PR-së ftoi qytetarët ta shohin modelin arrogant të kryeministrit si shkak për deformimin e shoqërisë.
“Edi Rama ka futur edhe një element tjetër shumë negativ në politikë, elementin e përbuzjes, të sharjes dhe të fyerjes. Në të gjitha historitë e kombeve, një njeri që shan, një njeri që fyen, një njeri që përbuz, nuk mund të ndërtojë, vetëm shkatërron”, tha më tej Mediu.
Ai shtoi se në 25 prill, përmes votës, shqiptarët duhet të ndryshojnë këtë mentalitet dhe këtë kulturë.
