Teuta pret Tiranën në shtëpi nesër në orën 16.45, në takimin e vlefshëm për javën e 11-të të Kategorisë Superiore.
Në konferencën e zakonshme për shtyp ka dalë trajneri i durrsakëve, Edi Martini. Tekniku u shpreh se, pavarësisht nivelit të kundërshtarit, ekipi i tij e ka potencialin për të marrë tre pikët. Sa i përket luftës për titull, ai pohon se skuadra do jetë aty deri në fund.
“Tirana është ndeshja e radhës, kampionati është i gjatë. I trajtojmë bardheblutë si të gjithë rivalët e tjerë. Normalisht është një ndeshje radhës, nuk duhet ta cilësojmë si një ndeshje shumë të rëndësishme. Të gjitha sfidat janë të rëndësishme. Tre pikë merr me Tiranën, tre merr edhe me Apoloninë dhe Skënderbeun.
Është një ndeshje në të cilën ne do të futemi në fushë dhe do të kërkojmë fitoren. Me Tiranën të gjitha ndeshjet janë të forta, të bukura, të luftuara dhe kjo na motivon edhe më shumë. Mendoj se e kemi aftësinë, forcën dhe lojtarët e duhur që t’ia dalin me sukses .Me thënë të drejtën nuk i druhem asgjëje, respektojmë çdo kundërshtar. Që t’i druhem dikujt apo një ekipi nuk është në ADN-në time dhe në të ekipit tonë.
Në kushtet që bëhet kampionati, pa tifozë, nuk më duket se ka rëndësi kush luan. Fati nuk ka qenë me ne, por edhe në disa takime arbitrat na kanë mohuar dy apo tre penallti, me Laçin dhe Skënderbeun. Kjo ka qenë arsye pse në Durrës nuk kemi fituar. Nuk e di kush do jenë rivalët për titull deri në fund, por ne do jemi në lojë deri në ditën e fundit të kampionatit” – tha ai.
