Kryeministri Edi Rama i është përgjigjur sot, pas disa ditësh, deklaratave nga salla e Kuvendit të presidentes në detyrë të Kosovës, Vjosa Osmanit.
Në seancën ku Osmani mbajti fjalimin e saj, Kryeministri Edi Rama zgjodhi të mos ishte prezent, duke shënuar një rast të paprecedentë.
Gjithsesi sot Rama ka zgjedhur të japë reagimin e tij, lidhur me objektivin që ka shprehur 7 vjet më parë kur u ul në postin e Kreut të Qeverisë, për zero probleme me fqinjët.
“Zero problemeve me fqinjët nuk do të thotë të fshehësh problemet, por zerim të tyre. Nuk është se ne kemi probleme, nuk kemi asnjë problem me Kosovën.
Për fat të keq Kosova ka probleme me veten dhe nëse mund të bëj një përkufizim, prej disa kohësh politika e brendshme është bërë politikë e jashtme dhe ajo e jashtme është bërë e brendshme.
Kjo e ka rraskapitur Kosovën. Është një problem që e shoh me shumë shqetësim e kam adresuar në mënyrë konstante në të gjitha bisedat e mia me udhëheqësit në Kosovë.
Jam përpjekur edhe publikisht pa dashur të rëndoj askënd. Është tipike ajo që ndodh me qasjen ndaj Shengenit rajonal ku një nga shtylla e politikës së jashtme që ka të bëjë me politikën rajonale është bërë si kalaja e Rozafës në Kosovë.
Për mua është e pakonceptueshme që një qeveri legjitime të firmosi me vullnetin e shtetit të Kosovës në Shtëpinë e Bardhë për shengenin dhe një Presidente në detyrë shfaqet në Shqipëri të bëjë politikë të brendshme me këtë.
Akoma më grotesk është debati për traun. Paraqitet trau i pagesës së rrugës si kufi i vendosur për Kosovën. Kjo është të bësh politikë me një çështje administrative me vendin fqinj, të vish në Tiranë, të bësh propagandë për të fituar vota në Kosovë.
Ai tra atje nuk është kufi mes Shqipërisë dhe Kosovës. Nëse për zonjën Vjosa atdheu është Kosova dhe Shqipëria ky tra është në mes të atdheut dhe duhet ta paguajnë të gjithë atdhetarët”, tha Rama.
Vjosa Osmani, gjatë vizitës në Tiranë shprehu kundërshtitë e saj lidhur me shengenin Ballkanik.
“Sa i përket mini-Shengenit kam akoma të njëjtin qëndrim. Ia kam përcjellë kryeministrit Rama gjatë vizitës në nëntor dhe do ta përsëris të njëjtën gjë dhe nesër. Ka shumë argumente mbi bazën e të cilëve kemi ndërtuar atë qëndrim. Ka shumë shpresa për ta bindur kryeministrin Rama që ky nuk është projekt që favorizon Kosovën dhe Shqipërinë. Fatkeqësisht ai e bindi kryeministrin Hoti që ta nënshkruajë. Ajo çka do kërkoj është ta kemi dokumentin. Ne vetëm flasim, por nuk kemi asnjë dokument se çfarë është ky mini-Shengen. Mendoj që nga fillimi është gabim. Kjo iniciativë nuk e ka përfshirë Kosovën nga fillimi, nuk është konsultuar Kosova”, tha ajo.
