Nga Boldnews.al
E gjithë Bota i numëron me gishtat e duarve ata shkencëtarë të cilët po japin formulën për vaksinën kundër coronavirusit, por vendi ynë “prodhon” shumë koka të mëdha të shkencës të nivelit botëror, që janë vendosur në godinën e përhimtë që njihet edhe si kryeministria. Kreshkencëtari, kryevirologu, kryehetuesit, koka i kokave, Rama, ka nxjerrë kanakarin e tij Endri Fuga për të shprehur një zbulim të madh…
“Shpresojmë që mutacioni i ri nuk do ta bëjë COVID-19 rezistent ndaj vaksinës ekzistuese. Por është një kujtesë kundër egoizmit kombëtar. Vendet e fuqishme mund të blejnë të gjithë dozat e vaksinës pa lënë asgjë për pjesën tjetër, por një mutacion i vogël mund ta bëjë të gjithë përpjekjen të padobishme. Vaksinimi universal është një domosdoshmëri”, shkruan Fuga në një postim në Twitter.
Mendja brilante Fuga dhe Fug (k)-sat që e rrethojnë, i dalë fillimisht nga “Akademia Veliaj”, ku militoi me organizatën “Mjaft” dhe më vonë u bë krahu i djathtë i kreut të qeverisë sonë Edi Rama, po hedh tymnaja për të mbuluar dështimin. Sot ai flet për mutacione të Covid-19, duke shpërndarë në publik jo informacion, por hi propagandistik për të kamufluar dështimin total në lidhje me sigurimin e vaksinave efikase si Pfizer dhe Moderna, të miratuara nga SHBA dhe BE.
Shefi i tij Rama, i cili para se të nisej për në SHBA për shoping, u shpreh se nuk do të linte gurë pa lëvizur që të siguronte vaksinën për shqiptarët, sot hesht për këtë çështje madhore dhe sheh ëndrra me Skënderbeun. Ai i lëvizi “gurët” në Amerikë, por nën to “gjeti” dis arroba firmato për vete dhe bojëra për të pikturuar dragonj të tërbuar dhe më pas i shet si piktura me vlerë të madhe artistike.
Pasi nuk siguroi vaksinën, propaganda e Kryeministrit po shpreson se mutacioni i Covid-19 të përhapet në mënyrë që të dalë ndonjë shkencëtar, qoftë edhe nga Akademia e Shkencave të Skënder Gjinushit, që t’i mbushë mendjen popullit shqiptar se kryevaksionologu i madh Rama e dinte që sëmundja do kishte mutacione dhe për këtë arsye nuk e solli vaksinën në vend.
Në Serbi kanë mbërritur më shumë se 5 mijë doza vaksinë të kompanisë Pfizer kundër “Covid-19”, në Britaninë e Madhe ka nisur vaksinimi prej disa ditësh, në SHBA gjithashtu, ndersa edhe disa vende të BE-së po e aplikojnë. Në vendin tonë fjalët janë të mëdha, por veprat nuk po shihen gjëkundi, duke u mbytur në motacionin e propagandës.
