Partia Demokratike, përmes përfaqësuesit të saj, Akil Kraja, akuzoi kryebashkiakun Erion Veliaj që në 5 vjet ka ngritur mesatarisht 540 kulla me vlerë 2.2 miliardë euro.
Në denoncimin e rradhës ndaj Kryebashkiakut të Tiranës, Kraja tha se edhe këtë vit, Erion Veliaj, me mbështetjen e Edi Ramës do të vazhdojnë të betonizojnë Tiranën.
“Buxheti i bashkisë parashikon rritje të të ardhurave nga taksa në ndërtim.
Gati në çdo rrugë në Tiranë, ndërtohen kulla.
Në kulmin e krizës ekonomike, të daljes pa punë të mijëra njerëzve, të falimentimit të shumë bizneseve, bilanci vjetor për Erion Veliajn do të jetë 26% më shumë kulla, sesa ishte parashikimi në fillim të vitit.
Për qytetarët kjo përkthehet në trafik më të rënduar, në ajër më të ndotur, në më pak hapësira për lulishte”, tha Kraja.
Sipas tij, 1ë kur ka marrë drejtimin e Tiranës, 5 vjet më parë, Erion Veliaj ka ndërtuar mesatarisht 540 kulla 10 katëshe.
“2.2 milairdë euro është një shumë gjigande, që reflekton sesa thellë janë lidhur interesat e krimit të organizuar me bashkinë e Erion Veliajt dhe me qeverinë e Edi Ramës.
Nën drejtimin e dyshes Rama-Veliaj Tirana është kthyer në një lavatriçe të madhe të parave të pista, pasojat e të cilave i vuajnë direkt qytetarët.
2.2 miliardë euro të investuara në beton, pra 540 kulla 10 katëshe kanë bërë që trafiku në kryeqytetit të kthehet në një torturë të vërtetë, ndërsa niveli i ndotjes së ajrit e bën Tiranën që nga qytetet më të këqinj në Europë për të jetuar”, tha Kraja.
Duke akuzuar Erion Veliajn si një politikan që nuk e mban fjalën, Kraja u shpreh se ai premton mashtrime, njësoj si shefi i tij në qeveri.
“Erion Veliaj premtoi moratorium për lejet e ndërtimit, por sot Tirana është një qytet betoni, që pastron paratë e krimit dhe dëmton jetën dhe shëndetin e qytetarëve.
Ndërsa kullat shtohen, ajri ndotet, lulishtet zhduken, në Tiranën e Erion Veliajt nuk shtohet asnjë orë ujë ne çezma, rrugët mbrten të shkatërruara dhe shërbimet jetësore nuk përmirësohen.
Boll më me Erjonin dhe betonin!”, tha Kraja.
