Enti Rregullator i Energjisë ka rrëzuar për herë të dytë kërkesën e Operatorit të Sistemit të Transmetimit për rritjen e tarifës së transmetimit të energjisë për vitin 2021. OST kërkoi rritjen e kësaj tarife në 1.31 lekë/kwh nga 0.75 lekë/kwh që është për vitin 2020, por pas vendimit të parë, ERE ka vendosur sërish të mos fillojë procedurën e shqyrtimit të aplikimit për shkak të mos argumentimit nga ana e OST mbi nevojën e kësaj rritjeje.
Sikurse në vendimin e parë, Enti Rregullator argumenton se llogaritë kontabël të pasqyrave financiare vijojnë të mos paraqiten sipas “Sistemit të njehsuar dhe të standardizuar të llogarive”. Ndërkohë që, lidhur me Planin e investimeve për vitin 2021, konstatohet se është paraqitur vetëm një informacion narrativ dhe tabelar, ndonëse operatori duhet të bazohet dhe të respektojë Analizën e plotë të kosto përfitimit, sigurimin e efektivitetit të kostove të projektit dhe kostove të argumentuara, përfshirë plan investimesh të detajuar me afatet përkatëse.
Sipas Entit Regullator, në rast se do të aplikohej një tarifë e pambështetur në llogaritje të sakta dhe transparente ndaj përdoruesve të rrjetit, stabiliteti financiar i tregut të energjisë do të cenohej dhe do të përballej më vështirësi të theksuara të cilat mund të përshkallëzoheshin në humbje financiare të mëtejshme për shoqëritë e rregulluara dhe rritje të kostove operative të paarsyeshme për përdoruesit e tjerë të rrjetit të transmetimit. Përveç tarifës së transmetimit, më herët ERE rrëzoi dhe kërkesën e OST për miratimin e planit të investimeve me fondet e shoqërisë për vitin 2020. /Scan Tv/
