Deputeti Lefter Maliqi paralajmëron se brenda muajit Dhjetor do të bëjë publike forcën politike së cilës do i bashkohet për të garuar në zgjedhjet e 25 prillit. Në një intervistë në “Fjala”, Maliqi tha se është duke zhvilluar takimet e fundit për të konkluduar pozicionimin final.
Deputeti bëri edhe një deklaratë të fortë, kur tha se opozita e bashkuar, nëse nuk shpall kandidatët brenda muajit Dhjetor apo Janar, rrezikon të humbasë zgjedhjet e 25 prillit.
“Opozita është drejt fitores, por është shumë e vonuar. Kjo vonesë, moskrijimi i koalicioneve dhe mos shpallja e kandidatëve që është shumë thelbësore, se njerëzit do votojnë dhe kandidatët nuk do votojnë vetëm liderët e partive, është shumë e vonuar dhe rrezikon. Nëse në fund të dhjetorit, apo në fund të janarit, nuk ka shpallur koalicionet e kandidatët, rrezikon seriozisht fitoren në zgjedhjet e ardhshme. Për të shmangur këtë pakënaqësi nga kjo keq-qeverisje, duhet që opozita të zbresë në bazë, jo në media. Në media le të dalin 2-3 veta siç dalin ata të PS-së, por në bazë nuk po shikojmë njeri. Janë disa eksponentë të LSI-së në bazë, por nuk po shikojmë eksponentë të tjerë. Nëse nuk i shpall në dhjetor dhe në janar kandidatët, PD rrezikon seriozisht zgjedhjet dhe kjo është një fatkeqësi. Në fillim të janarit duhet të jenë në bazë kandidatët. Edhe koalicionet duhen shpallur brenda dhjetorit. Sepse nuk ka më kohë”, deklaroi Maliqi.
