Zhaklina Peto, një prej kandidateve për të qenë pjesë e Gjykatës Kushtetuese duhet të dalë nesër para Këshillit të Emërimeve në Drejtësi, por do të mungojë. Ajo ka shkuar disa herë në Gjykatë për të kundërshtuar skualifikimin e KED, por në mbledhjen e nesërme nuk do të marrë pjesë pasi është infektuar me Covid.
Zhaklina Peto foli për ABC News duke thënë: “Prej 19 dhjetorit jam konfirmuar si e infektuar me Covid 19 nga ISHP. Jam në karantinë. E kam të pamundur të dal nga shtëpia dhe të mbledh dokumente për t’ia dërguar KED-së. I kam njoftuar për këtë dhe ju kam kërkuar kohë. Nuk më është dhënë koha e duhur.
Zotëroj dokumentacion se makina e blerë justifikohet nga të ardhurat e mia sipas të dhënave të tatimeve. Po ashtu, për pretendimin tjetër e ndërtimit të një kati pa leje, mund të siguroj dokumente se shtesa është bërë përpara se unë ta blija banesën. Por këto dokumente nuk mund t’i administroj tani që jam me Covid dhe në shtëpi”.
Kujtojmë se KED kualifikoi sot dhe kandidatët për një vakancë tjetër në Kushtetuese. Ata janë Përparim Kalo, Aleksandër Toma.
