Sindikata e Minatorëve të Bashkuar të Bulqizës, i dorëzoi të hënën, Kuvendit dhe Qeverisë një peticion me mbi 10700 firma, përmes të cilit kërkohet miratimi i statusit të minatorit.
“Prej katër javësh kemi nisur një peticion për të kërkuar miratimin e Statusit të Minatorit, profesionit më të vështirë dhe më të rrezikshëm. Deri më sot janë të miratuar rreth 20 Statuse, edhe për profesionin aspak të vështirë të deputetit, ndërsa minatorët mashtrohen dhe zvarriten prej 30 vitesh,” tha Elton Debreshi, kryetar i Sindikatës.
Peticioni është nënshkruar në letër, por edhe online, shtrirë në disa qytete të Shqipërisë. Statusi i minatorit do jepte trajtim preferencial nga shteti për minatorët që dalin në pension dhe familjet e tyre në rast aksidentesh në punë.
Me anë të peticioni, minatorët kërkojnë sigurimin e jetës dhe garantimin e dëmshpërblimit të familjarëve me 6 milionë lekë në rast aksidentesh me pasojë vdekjen në vendim e punës.
Sipas draftit, familjarët e viktimave duhet të marrin një pension të barabartë me 100% të pagës dhe bursa studimi universitare për fëmijët. Në draft-propozimin e sindikatës, dëmshpërblim kërkohet edhe në raste aksidentesh me pasojë pamundësinë për punë apo aksidente më të lehta.
“Nisur nga ky numër i jashtëzakonshëm nënshkrimesh në një periudhë kaq të shkurtër, është i qartë vullneti i qytetarëve për këtë çështje” shprehet Debreshi.
Në peticion kërkohet rritja e pensioneve për punonjësit e nëntokës në 35 mijë lekë, si dhe dalja në pension në moshën 53 vjeç për ata që punojnë 11 vite apo më shumë nën tokë dhe për ata që kanë 10 vite punë, në 55 vjeç.
Pavarësisht premtimeve të Kryeministrit Edi Rama për statusin e minatorit, çdo nismë e paraqitur është rrëzuar pasi është konsideruar si një barrë e rëndë për buxhetin e shtetit.
