Eksperti i ekonomisë pranë PD, Dorian Teliti, e ka cilësuar si qesharak shpërblimin prej 5 mijë lekësh të caktuar nga qeveria për 670 mijë pensionistë me rastin e festave të fundvitit.
Teliti akuzon Qeverinë se pasi për 7 vjet i la në rrënim ekonomik, sot i le pensionistët në rradhë e të dëshpëruar, për të marrë shpërblimin qesharak.
“Të patrajtuar financiarisht dhe të harruar nga qeveria e klientelës, pensionistët janë të detyruar të presin lëmoshën e qeverisë. Shqipëria ofron ndihmën më të vogël ekonomike për qytetarët e saj – më pak se çdo vend i botës.
Për 7 vite, Rama u ka sjellë shqiptarëve vetëm rrënim ekonomik, rritje të kostos së jetesës, shtim të papunësisë dhe rrënim të sistemit shëndetësor. Kosto e jetesës po rritet çdo ditë. Këtë vit çmimet e ushqimeve janë rritur me 4.7%, duke shkaktuar një humbje të fuqisë blerëse të pensionistëve prej rreth 100 mijë lekësh të vjetra. Pensionistët e shohin këtë shtrenjtim të jetesës kudo, në supermarkete, dyqane ushqimore, në farmaci.
Kjo është e turpshme! Boll më me Ramën!”, shkruan Teliti në rrjetet sociale.
