Ministrja e Shëndetësisë, Ogerta Manastirliu, ka bërë apel që qytetarët të respektojnë masat kundër Covid dhe të festojnë vetëm në familje këtë fundvit. Teksa ka qenë duke vizituar pikat e testimit të shpejtë në kryeqytet, ministrja tha se kufizimi i kontakteve është i domosdoshëm.
“Rekomandimet dhe të gjitha masat e mëtejshme që ne do marrim do bëhen me dije për të gjithë qytetarët sa i përket strategjisë qoftë dhe për festat e fundvitit, kufizimi i kontakteve është shumë i rëndësishëm, le të festojmë në familje këtë vit”, pohoi ministrja.
Manastiliu ka bërë me dije se testimi i shpejtë ka nisur në 6 pika në Qendra Shëndetësore në Tiranë dhe rezervimi për kryerjen e tyre tashmë do të bëhet nga mjekët e familjes, ndërsa do të bëhet në fazat e hershme të infektimit.
“Sigurisht do të vijojë në gjithë Shqipërinë, në qendrat e testimit në komunitet. Në Tiranë kemi filluar me 6 pika: Në qendrën shëndetësore nr. 9, qendrën shëndetësore nr.10, në qendrën shëndetësore të Kombinatit, në qendrën shëndetësore Qyteti Studenti, në qendrën shëndetësore Kodër-Kamëz dhe gjithashtu edhe në pikën e Brrakës, në qendrës shëndetësore nr. 4”, bëri me dije Manastirliu.
Në prag të festive të fundvitit Manastirliu u ka apel qyetarëve të shmangin grumbullimet dhe të festojë brenda familjes tyre të vogël, për të kufizuar përhapjen e infeksionit. “Është shumë e rëndësishme tashmë që vijnë edhe festat e fundvitit, të jemi të gjithë sa më shumë vigjilentë dhe të impenjuar për të ruajtur masat e distancimit social, vendosjen e maskës, ruajtja e higjienës”, apeloi Manastirliu.
Ndërkohë që në shumë vende ka nisur vaksinimi kundër Covid-19, ministrja Manastirliu vijon të paraqesë si sukses testimet e shpejta dhe të përsërisë apelet që qytetarët të kujdesen duke respektuar masat, ndërsa nuk dha sqarime nëse Qeveria dhe institucionet që menaxhojnë situatën e pandemisë po i bëjnë detyrat, një prej të cilave është sigurimi i vaksinës.
