Kreu demokrat Lulzim Basha u shpreh sot se mbetet i vendosur në përfshirjen e rinisë në politikë. Gjatë një bashkëbisedimi me të rinjtë, Basha tha se fytyra e ndryshimit në Shqipëri, mbetet gjithmonë ajo e rinisë.
“Qëllime djallëzore synojnë dekurajimin e rinisë. Brezi i ri të trajnohet për të ushtruar përgjegjësinë individuale në shoqërinë shqiptare.
Duke zbehur entuziazmin rinor, synojnë shfuqizimin e të rinjve. Por shfuqizimi i rinisë, është shfuqizim i shoqërisë”, tha Basha.
Ai ka vlerësuar rolin e rinisë 30 vjet më parë në shembjen e diktaturës, ndërsa premtoi se Qeveria e ardhshme, do t´i hapë rrugën rinisë.
“Sot, kemi një rini më të aftë, më bashkëkohore, më të ditur. Ky vend i ka potencialet ta kapërcejë krizën. Pa pjesëmarrjen e rinisë, asgjë s’mund të arrihet. Programi ynë, çlirim i potencialeve të rinisë”, u shpreh Basha.
Duke shprehur mbështetjen për barazinë gjinore, Basha tha se pa fuqizimin e saj, s´mund të pretendohet fuqizimi i shoqërisë.
Lidhur me varfërinë, kreu demokrat e cilësoi si një instrument për mbajtjen e pushtetit të korruptuar, ndërsa shtoi se shtresa e mesme mbetet mbrojtësja më e mirë e demokracisë.
