U luajtën dje ndeshjet e javës së nëntë të Kategorisë Superiore, që i vunë kapakun fazës së parë të këtij edicioni. Por ritmi është i shpejtë dhe skuadrat rikthehen shpejt në fushë.
Saktësisht të mërkurën, kur luhen të gjitha ndeshjet e javës së 10-të. Do të zhvillohen katër ndeshje në orën 13:45. Partizani luan si vendas ndaj Kastriotit në “Selman Stermasi”.
Të kuqtë duan rikthimin te fitoret, ndërsa Kastrioti tenton të qëndrojë i pashkëputur nga grupi i skuadrave pretendente dhe deri më tani ia ka arritur qëllimit.
Në Laç vendasit presin Bylisin. Një fitore e ballshiotëve do i dërgonte kurbinasit në zonën e ftohtë të renditjes. Kalendari i ka dhënë Vllaznisë një dorë të mirë për të marrë veten pas humbjes me Laçin dje.
Shkodranët udhëtojnë në Fier për të sfiduar Apoloninë dhe tre pikët janë detyrim. Ndeshja tjetër e orës 13:45 është ajo mes Skënderbeut dhe Teutës. Teuta dje u rikthye te fitorja pas një morie barazimesh. Korçarët nga ana tjetër kanë treguar se dinë të bëjnë dëme, ashtu si ndaj Tiranës dje.
Supersfida e javës së dhjetë luhet në orën 16:45 në “Elbasan Arena”. Kukësi pret Tiranën në një ndeshje mes pretendentësh, që pritet të tregojë shumë për nivelin e dy skuadrave. Një fitore e bardhebluve i barazon ata me verilindorët (16 pikë) në renditje. /abcnews/
