Në oborret e spitaleve COVID, problematikat e familjarëve të pacientëve janë nga më të ndryshmet. Prej tre ditësh një qytetar nga Tirana pret me orë të tëra përpara spitalit infektiv, për të marrë skedën e vdekjes së vjehrrit të tij.
Administrata e spitalit COVID 1, i ka lëshuar një skedë me emër të gabuar.
“Ka tre ditë që ka vdekur. Vjehrri im në rastin konkret, dhe dokumentacionin në skedën e vdekjes e kanë shkruajtur gabim. Kanë vendosur gabim, edhe emër, edhe mbiemër, edhe datëlindje, duke i dhënë edhe kartën e identitetit madje. Fola me doktoreshën, më tha prit se erdha e tani nuk më hap as telefonin. Mirë që këmi problemet e humbjes së jetës nga covidi, po tani duhet të durojmë edhe burokracitë. Është një reaksion zinxhir që nuk lidhet vetëm me skedën e vdekjes, lidhet me funeralin, lidhet me shërbimet që marrim në bashki”, ka thënë ai.
Pavarësisht neglizhencës nga kjo administratë, edhe pritja për tërheqjen e skedës së korigjuar, është barrë më vete për këtë qytetar.
“Do ta merrnim që dje skendën e vdekjes, të ribërë. Nuk e mora. Edhe si puna ime besoj ka shumë njerëz që vijnë vëërdallë në spitale. Jemi dhe nëpër punëra. Rrezikojmë të na heqin edhe nga puna për këto gjëra”, është shprehur ndër të tjera qytetari.
Kostot funerale të personave që humbin jetën si pasojë e COVID 19, mbulohen nga shteti. Për ti përfituar, familjarët duhet të dorëzojnë dokumentacionin e saktë në zyrat e Bashkisë, por në rastin në fjalë, si pasojë e këtij gabimi nga ana e spitalit, familja është detyruar të paguajë të gjithë kostot me buxhetin e saj. /abcnews.al
