Gjykata e Apelit ashpërson masën për gjyqtaren Mimoza Margjeka duke e kthyer nga “detyrim paraqitje” në “arrest shtëpie”. Edhe bashkëshorti i saj Arben Cara është lënë në “arrest shtëpie”.
Gjyqtarja Mimoza Margjeka akuzohet për akuzën për korrupsion për lirimin e një shtetasi në qytetin e Korçës.
Këto akuza gjyqtarja i ka hedhur poshtë, duke deklaruar se janë të montuara dhe kjo lidhet me faktin se nuk pranoi të certifikonte rezultatin e zgjedhjeve lokaleve për të shpallur fituese kandidaten e PS-së për kryetare bashkie.
Sipas SPAK, shtetasit Nejton Bali, Klaudjo Zhilla dhe Skënder Demiraj (me profesion avokat), në bashkëpunim me njëri tjetrin, kanë konsumuar veprën penale “Korrupsioni aktiv i gjyqtarit, prokurorit dhe i funksionarëve të tjerë të drejtësisë”, parashikuar nga neni 319 e 25 i Kodit Penal, duke i dhënë shtetases Mimoza Margjeka, me detyrë gjyqtare, aktualisht e komanduar në Gjykatën e Apelit Korçë, nëpërmjet bashkëshortit të saj, shtetasit Arben Cara, një shumë prej 6.000 (gjashtë mijë) eurosh, si përfitim të paligjshëm.
Kjo shumë parash, është dhënë me qëllim ndryshimin e masës së sigurimit, nga “arrest në burg” në “garanci pasurore”, ndaj shtetasit Orion Bali, i arrestuar nga Prokuroria pranë Gjykatës së Shkallës së Parë Pogradec, për veprën penale “Ndihmë për kalim të paligjshëm të kufijve”, parashikuar nga neni 298/3 i Kodit Penal. Në shkëmbim të përfitimit të paligjshëm ka rezultuar se Gjykata e Apelit Korçë ka ndryshuar masën e sigurimit nga “arrest në burg” në “garanci pasurore”, për këtë shtetas.
