Milani regjistroi një tjetër barazim 2-2 në Serie A, në transfertë ndaj Genoas. Kuqezinjtë rikuperuan dy herë disavantazhin ndaj Genoas dhe në fund u rikthyen në shtëpi me një pikë.
Trajneri i ekipit kryesues të kampionatit italian, Stefano Pioli foli pas ndeshjes dhe e cilësoi shumë të vështirë përballjen e mbrëmjes së sotme. Milani kryeson Serie A me një pikë më shumë se Interi, teksa Pioli insiston se objektivi është rikthimi në Champions League.
“Ishte një ndeshje e komplikuar dhe e vështirë, pasi Genoa na i mbylli të gjithë hapësirat. Në pjesën e parë i patëm rastet për të kaluar në avantazh. Ishte një sfidë tepër e komplikuar, por u treguam të aftë në gjetjen e barazimit.”
“Pësuam dy gola edhe sonte, edhe pse nuk është se lejuam shumë hapësira, por po shtohen disi golat e pësuar. Fusha pati ndikimin e vet, ishte e vështirë të luaje një futboll cilësor. Kishim 6 lojtarë jashtë dhe është momenti për të shtrënguar dhëmbët.”
E ardhmja? Dy ndeshjet e radhës nuk do të tregojnë qëllimet tona. E dimë që ka shumë vite që ky klub nuk merr pjesë në Champions League, rikthimi aty është objektivi ynë. Po luajmë shumë ndeshje, sonte pashë një ekip bujar në fushë.
