Alban Xhaferi e merr me sportivitet faktin se Disiplina ka vendosur të bëjë fillimisht shembull Vllazninë për disa tifozë më shumë nga numri që lejohet në kushtet e pandemisë në stadium.
Sponsori i Vllaznisë, duke folur dje për “Panorama Sport”, sqaroi se e priste diçka të tillë, pasi u bë çështje mediatike.
“Normalisht, nëse flasim realitetin, ky vendim erdhi pasi sebepi i kësaj pune u bë Olsi Rama. Drejtori i Partizanit bëri atë deklaratë pas ndeshjes dhe u bë bujë, a thua kishte ndodhur diçka e madhe. Më pas erdhi edhe gjoba, pasi vetë çështja u bë mediatike.
Ne nuk jemi as të parët dhe as të fundit, pasi kjo puna e tifozëve është lehtësisht e verifikueshme nëse shikon çdo ndeshje të Superiores. Jemi vetë dëshmitarë që sa herë kemi shkuar në rrethe, prania e të paktën 200-300 tifozëve ka qenë krejt normale. Pastaj, shikoni edhe derbin Tirana-Partizani. Kjo është diçka që shikohet, s’ka nevojë për argumente të tjera. Keqardhja e vetme është që pse duhet të ishim bërë ne shembull për këtë, por me sa duket, deklarata e drejtorit të Partizanit ishte në atë nivel që të kërciste gjoba. Kjo është e gjitha.
“E sigurt është që Vllaznia nuk do të ankohet asnjëherë kur të luajë në çdo vend se sa tifozë ka në stadium. Për asnjë klub nuk kemi për t’u ankuar. Le të jenë plot stadiumet dhe ne do të kënaqemi më shumë.- deklaroi Xhaferi.
